Ասադը հայտնել է, թե որ դեպքում հրաժարական կներկայացնի
Սիրիայի նախագահ Բաշար Ասադը պատրաստ է հրաժարական ներկայացնել միայն այն դեպքում, եթե դա կարող է լուծել սիրիական ճգնաժամը: Այս մասին նա հայտնել է իրանական Khabar TV-ին տված հարցազրույցում:
«Եթե իմ հեռանալը ճգնաժամի լուծում է, ես, անկասկած, դա կանեմ»,- հայտարարել է Ասադը՝ հավելելով, որ «միայն սիրիացիները» պետք է որոշեն, թե ով է լինելու երկրի նախագահը:
Ասադը հիշեցրել է, որ անցած տարի կայացած ընտրություններում երկրի բնակիչները աջակցել են իր թեկնածությանը:
«Բոլոր նրանք, ովքեր հավատում են, որ իմ հրաժարականը կարող է կարգավորել ճգնաժամը, պետք է մասնակցեն ընտրություններին ու փորձեն ապացուցել իրենց տեսակետը: Մենք դրա դեմ առարկություն չունենք»,- ասել է Սիրիայի նախագահը:
Ասադի խոսքով՝ Սիրիայի ժողովրդի ցանկացած որոշում երկրի ապագայի վերաբերյալ պարտադիր պետք է լինի երկրի իշխանությունների ու անձամբ իր համար:
Ասադը ուշադրություն է հրավիրել այն փաստին, որ Սիրիայում ցանկացած գործողությունների հիմքը ահաբեկիչներին ոչնչացնելն է:
«Ցանկացած քաղաքական որոշման համար հարկավոր է կայունություն երկրում»,- բացատրել է նա:
Սիրիայի նախագահի խոսքով՝ պաշտոնական Դամասկոսը պատրաստ է քաղաքական երկխոսության ընդդիմության հետ, սակայն ապստամբները ազդեցություն չունեն ահաբեկիչների վրա:
«Երկխոսությունը ընդդիմության հետ կարող է օգտակար լինել Սիրիայի ապագայի, սակայն ոչ ահաբեկիչների դեմ պայքարի լուծման համար»,- ասել է Ասադը:
