Հյուրանոցներն ավելացել են, փողը՝ նվազել

2014 թվականի վերջին Հայաստանում հաշվվել է 268 հյուրանոց և հյուրանոցային հանգրվան, որից 89-ը՝ Երևանում։ Ազգային վիճակագրական ծառայության տվյալներով՝ 2013 թվականի համեմատ հյուրանոցների թիվն աճել է 39-ով կամ 17%-ով (այդ թվում՝ Երևանում հյուրանոցների թիվն աճել է 14-ով կամ 18.7%-ով)։

Սակայն հյուրանոցների և հյուրանոցային հանգրվանների աճի ֆոնին բավականին տարօրինակ է դիտվում ոլորտի հասույթի կտրուկ անկումը։ Այսպես, 2014 թվականին ՀՀ հյուրանոցային տնտեսության ոլորտի հասույթը կազմել է 24.9 մլրդ դրամ՝ 2013 թվականի 51.3 մլրդ դրամի դիմաց։ Եկամուտները կիսով չափ կրճատվել են։ Իսկ Երևանում հասույթը կրճատվել է 57.6%-ով՝ 41.9 մլրդ դրամից հասնելով 17.7 մլրդ դրամի։

Համեմատության համար նշենք, որ 2013 թվականին հյուրանոցային տնտեսության հասույթը աստղաբաշխական աճ է ունեցել։ Հանրապետության մասշտաբով հյուրանոցային տնտեսության հասույթը աճել էր 2.6 անգամ (19.5 միլիարդ դրամից հասնելով 51.3 մլրդ դրամի)։ Իսկ մայրաքաղաքի հյուրանոցային տնտեսության օբյեկտների հասույթը աճել էր 3 անգամ՝ 13.9 մլրդ դրամից հասնելով 41.9 մլրդ դրամի։

Ընդ որում, նույն պաշտոնական վիճակագրության համաձայն՝ 2014 թվականին ունեցել ենք զբոսաշրջիկների 11.3% աճ՝ 2013-ի համեմատ, իսկ հյուրանոցային ծառայությունների գնանկում նախորդ տարվա ընթացքում չի գրանցվել։ Այսինքն՝ հյուրանոցային բիզնեսի եկամտաբերության անկումը բացատրելը բավականին բարդ է։

Ամբողջական հրապարակումը կարող եք կարդալ 168 Ժամ թերթի այսօրվա համարում