Իլհամ Ալիևն ընդունել է Նիկոլայ Պատրուշևին
Ադրբեջանական APA լրատվական գործակալության փոխանցմամբ՝ Ադրբեջանի նախագահ Իլհամ Ալիևն այսօր ընդունել է Ռուսաստանի Անվտանգության խորհրդի քարտուղար Նիկոլայ Պատրուշևի գլխավորած պատվիրակությանը:
Հանդիպման ժամանակ Ալիևը հայտարարել է, որ Ռուսաստանի ու Ադրբեջանի միջև երկկողմ հարաբերությունները հաջողությամբ զարգանում են բոլոր ոլորտներում: Ալիևը կարևորել է երկու երկրների իրավապահ մարմինների միջև հարաբերությունների հաջող զարգացումը:
Ալիևն ընդգծել է երկու երկրների համապատասխան կառույցների միջև գործնական հարաբերությունների, տեղեկատվության փոխանակման, համատեղ միջոցառումներ անցկացնելու կարևորությունը՝ տարածաշրջանում անվտանգության ամրապնդման տեսանկյունից:
Պատրուշևն իր հերթին՝ Ալիևին է փոխանցել Ռուսաստանի նախագահ Վլադիմիր Պուտինի ողջույնները: Պատրուշևը նույնպես հայտարարել է, որ երկու երկրների միջև հարաբերությունները հաջողությամբ զարգանում են բոլոր ոլորտներում: Հանդիպման ժամանակ քննարկվել են փոխադարձ հետաքրքրության կենտրոնում ընկած հարցեր:
