«Դա ԱՄՆ նախագահի ընտրությունն է». Վիգեն Սարգսյան
«Մենք երկար ժամանակ է, որ լսել ենք ամերիկյան կողմից, որ պետությունը ներկայացված է լինելու նախագահական պատվիրակությամբ, այսինքն՝ նախագահի կողմից նշանակված պատվիրակությամբ: ԱՄՆ կառավարության կազմում գանձապետ քարտուղարի պաշտոնն ունի շատ բարձր դիրք պետության հանդիսավոր ներկայացման առումով, և դա ԱՄՆ նախագահի ընտրությունն է»,- այսօր Երևանում «Ընդդեմ ցեղասպանության հանցագործության» գլոբալ ֆորումի շրջանակներում լրագրողների հետ ճեպազրույցում հայտարարեց ՀՀ նախագահի աշխատակազմի ղեկավար, Հայոց ցեղասպանության 100-րդ տարելիցին նվիրված միջոցառումները համակարգող Վիգեն Սարգսյանը՝ պատասխանելով 168.am-ի հարցին, թե ինչպե՞ս է գնահատում այն, որ ԱՄՆ-ը Ցեղասպանության 100-րդ տարելիցի միջոցառումներին ներկայացված է լինելու ֆինանսների նախարարի մակարդակով:
Մեր դիտարկմանը, որ նշվում է, որ ԱՄՆ նախագահն այս տարի էլ չի հնչեցնի ցեղապանություն տերմինը, Վ.Սարգսյանը պատասխանեց, թե դեռ չհնչած հայտարարությունը չի կարող մեկնաբանել:
Մեր հարցին, որ Թուրքիայի ԱԳՆ պատվիրակությունն այս օրերին ԱՄՆ-ում է, այսինքն՝ թուրքական դիվանագիտությունը լա՞վ է աշխատում, Վ.Սարգսյանը Պատասխանեց. «Ոչ մի նոր բան դրա մեջ չեմ տեսնում, թուրքական պատվիրակություններն ամենուր են, նաև Գերմանիայում են և այլ տեղերում, բայց դա չխանգարեց Չիլիի ներկայացուցիչների պալատին ընդունել բանաձև, Ավստրիայի խորհրդարանին՝ անել իր քայլը, ԵԽ-ին՝ անել իր քայլը: Դա միշտ ընտրություն է, ընտրություն է նրա, թե որքանով արդյունավետ է պայքարը հանցագործության դեմ այս կամ այն ձևով»:
Թուրքիայի վարչապետ Դավութօղլուի ուղերձի վերաբերյալ Վ.Սարգսյանը նշեց, որ որևէ նոր բան չի տեսնում, կրկին ժխտողականության, իրերը քողարկելու և թացը չորի հետ խառնելու ջանք է, երբ զոհն ու դահիճը դրվում են նույն հարթակի վրա. «Տպավորություն է, թե կարծես եղել է պատերազմ, մենք ցավում ենք այդ զոհերի համար, բայց պատերազմներում կան կողմեր և դրանց ժամանակ յուրաքանչյուր ռեժիմ, յուրաքանչյուր պետություն ընտրում է իր դիրքն ու կեցվածքը: Եվ Թուրքիայի դիրքորոշումն Առաջին համաշխարհայինի ժամանակ բոլորին հայտնի է և հայտնի է, որ այդ ընթացքում կատարված հանցագործությունները ոչնչով չեն արդարացվում: Ի դեպ, Հոլոքոստն էլ է տեղի ունեցել պատերազմի ժամանակ: Ի դեպ, նույնը հանգամանքը պետք է հաշվի առնել ժխտողականության այն ջանքերի մեջ, երբ ասում են, որ ցեղասպանություն տերմինը գոյություն չի ունեցել, երբ կատարվել է Հայոց ցեղասպանությունը և դա ցեղասպանություն չէ: Նույն կերպ, երբ Հոլոքոստն է տեղի ունեցել, ցեղասպանություն տերմինը չի եղել, և Ռալֆ Լեմկինը, երբ հարցրել են, թե ի՞նչ է ցեղասպանությունը, նա ասել է, որ դա հայերի հետ Առաջին և հրեաների հետ Երկրորդ համաշխարահային պատերազմի ժամանակ կատարվածն է: Եվ այդտեղ շատ մեկնաբանելու բան չկա»:
