«Գազպրոմ Արմենիա»-ն այս տարի կկատարի շուրջ 11 միլիարդ դրամի ներդրում
Հանրային ծառայությունները կարգավորող հանձնաժողովն առաջիկա նիստում, ապրիլի 1-ին, կհաստատի «Գազպրոմ Արմենիա» ՓԲ ընկերության 2015 թ-ի ներդրումային ծրագիրը: Ըստ նախագծի՝ ընկերությունը նախատեսում է այս տարի ներդնել 10 մլրդ 990.5 մլն դրամ (առանց ԱԱՀ-ի):
Գազափոխադրման համակարգի Աբովյանի գազի ստորգետնյա պահեստարան-կայանի վերակառուցման և ընդլայնման համար կծախսվի 1 մլրդ 322 մլն դրամ, գազափոխադրման համակարգի վերակառուցման համար՝ 2 մլրդ 691.5 մլն, նոր բաժանորդների միացման համար` 391.4 մլն դրամ, գազաբաշխման համակարգի վերակառուցման համար՝ 1 մլրդ 972.4 մլն, գազափոխադրման համակարգում այլ ուղղություններով իրականացվելիք ներդրումները կկազմեն 576.9 մլն, գազաբաշխման համակարգում այլ ուղղություններով իրականացվելիք ներդրումները` 3 մլրդ 641.2 մլն դրամ:
Ի դեպ, նախագծում նշված է, որ 2013 թ-ի ընթացքում ներդրումային ծրագրից դուրս իրականացվել են 395 մլն դրամի ներդրումներ:
ՀԾԿՀ-ն նաև կսահմանի, որ մինչև այս տարվա հոկտեմբերի 15-ը «Գազպրոմ Արմենիան» ՀԾԿՀ-ի համաձայնեցմանը պետք է ներկայացնի ընկերության 2016-2018թթ. ներդրումային ծրագիրը:
