Ռուսաստանի կառավարությունն այսօր կքննարկի քաղաքացիների մնալու կարգի մասին Հայաստանի հետ համաձայնագրի հարցը
Ռուսական РИА Новости լրատվական գործակալության փոխանցմամբ` Ռուսաստանի կառավարությունն իր այսօրվա նիստում դիտարկելու է Ռուսաստանի ու Հայաստանի միջև ստորագրված համաձայնագրի վավերացման մասին օրենքի նախագիծը, որն առնչվում է մի երկրի քաղաքացիների կողմից մյուսի տարածքում մնալու կարգին:
Այս մասին հայտնել է Ռուսաստանի կառավարության մամլո ծառայությունը: Համաձայնագիրը Հայաստանի Հանրապետության ու Ռուսաստանի Դաշնության միջև ստորագրվել է 2014 թվականի հուլիսի 11-ին:
Հաղորդվում է նաև, որ Հայաստանի տարածքում Ռուսաստանի քաղաքացիների մնալու և Ռուսաստանի տարածքում Հայաստանի քաղաքացիների մնալու համար բարենպաստ պայմաններ ստեղծելու նպատակով համաձայնագիրը նախատեսում է երկու երկրների քաղաքացիներին ազատել 30 օրվա ընթացքում պարտադիր գրանցումից այն երկրի իրավասու մարմիններում, ուր մուտք են գործում նրանք:
