Գարիբաշվիլին Սաակաշվիլու կուսակցությանը մեղադրել է Թբիլիսիում զանգվածային անկարգություններ պատրաստելու մեջ
Ռուսական Интерфакс լրատվական գործակալության փոխանցմամբ՝ Վրաստանում նախկինում իշխող «Միասնական ազգային շարժում» կուսակցությունը նոյեմբերի 15-ին Թբիլիսիում պլանավորած ակցիայի ժամանակ սադրանք է պատրաստում: Այս մասին լրագրողների հետ զրույցում այսօր հայտարարել է Վրաստանի վարչապետ Իրակլի Գարիբաշվիլին.
«Զավեշտալի կլինի խոսել դավաճանների հայտարարած ակցիայի մասին, սակայն ես կարտահայտվեմ կարճ: Ինձ ասել են, որ ՄԱՇ-ի ներկայացուցիչները մտադիր են շրջաններում ապրող կարիքավոր քաղաքացիներին վճարել 15-ական լարի՝ նրանց Թբիլիսի բերելու, իրենց առջևում կանգնեցնելու ու անկարգություններ հրահրելու համար»:
Գարիբաշվիլու խոսքերով՝ առավել ցինիկ է հնչում այն թեման, որին իրենց ակցիան նվիրել են ՄԱՇ-ի ներկայացուցիչները: Ակցիան անցկացվելու է «Վրաստանը փրկել Աբխազիան ու Հարավային Օսիան ռուսական անեքսիայից»:
Գարիբաշվիլին ընդգծել է, որ բոլորին է հայտնի, որ Ցխինվալի օկուպացումն ու Աբխազիայի Կոդորի կիրճի կորուստը Սաակաշվիլու գլխավորած ՄԱՇ-ի պատճառով է եղել. «Մենք ստացանք ևս 25.000 փախստական: Ի՞նչ հիմքով են նրանք ցանկանում անցկացնել ակցիան»:
