Մարգվելաշվիլին աբխազներին ու օսերին առաջարկում է պետական կառուցվածքի եվրոպական մոդել
Грузия Online-ի փոխանցմամբ՝ Վրաստանի նախագահ Գեորգի Մարգվելաշվիլին «Իմեդի» հեռուստաընկերության եթերում անդրադարձել է Աբխազիայի խնդրին. «Եվրոպայում երկրները ստեղծվել են բազմաթիվ սկզբունքներով, սակայն մեկ բան հստակ է. ոչ մի ժողովուրդ ու էթնոս չի անհետանում քարտեզից, բոլորն ունեն հեռանկար ու ապագա: Մենք աբխազներին առաջարկում ենք նույնը:
Վրաստանն այնպիսի երկիր է, որ շրջանակում նրանք ունեն հեռանակար, եվրոպական ապագա, ժողովրդավարական հասարակություն կառուցելու, իրենց ինքնությունը ցուցադրելու հնարավորություն: Մեր հասարակությունը շատ խնդիրներ է վերապրել, բոլոր ուղղություններով եղել են բազմաթիվ սխալներ, և այնուամենայնիվ, մենք պետություն ենք, որում աբխազներն ու օսերն ունեն ապագա՝ որպես էթնոսներ, ժողովուրդներ:
Մենք կարող ենք մանրակրկիտ քննարկել, թե պետական կառուցվածքի ինչպիսի հեռանկարի շուրջ կարող ենք պայմանավորվածության գալ: Սակայն ելակետը պետք է լինի այն, որ մենք՝ վրացիներս, ցանկանում ու հավատում ենք միասնական, եվրոպական, ժողովրդավարական, ժամանակակից պետություն կառուցելուն, որի շրջանակներում թե՛ աբխազները, թե՛ օսերն առանց վիզայի կշրջեն Եվրոպայում: Դա մեր ընտրությունն է: Մենք աբխազների ու օսերի թշնամիները չենք»:
