Անշարժ գույքի շուկայի մասնակիցները բարելավում չեն նկատել
Պաշտոնական վիճակագրությունն այս տարվա առաջին կիսամյակի համար բավականին դրական լույսով է ներկայացրել Հայաստանում անշարժ գույքի շուկայում տիրող իրավիճակը՝ վկայելով, թե աճել են և´ առուվաճառքի գործարքները (Երևանում 23.3%-ով), և´ գները (1.3%-ով): Սակայն այս իրադրությունը չեն հաստատում մասնավոր հատվածի տվյալները:
168.am-ի հետ զրույցում «Ակցեռն» կորպորացիայի նախագահ Հակոբ Բաղդասարյանը նշեց, որ իրենց տվյալներով ո´չ գործարքներն են ավելացել և ո´չ էլ գների բարձրացում կա. «Մեզ մոտ տվյալների հակասություն կա: Մեր բազային տվյալները դա չեն տալիս: Գնային բարձրացում միանշանակ չունենք, իսկ գործարքների քանակով չեմ կարող ասել, քանի որ այդ թիվը կարող է տարբեր գործոնների հետ կապված լինել»:
Ըստ նրա՝ սեզոնայնությամբ պայմանավորված Երևանում մի քիչ ակտիվացել է վարձակալությունը՝ 20-30%: Հ.Բաղդասարյանի խոսքով՝ ամառային արձակուրդների շրջանում հիմնականում գերակշռում է կարճատև ժամկետային վարձակալությունը. «Որոշակի մշակույթ է ձևավորվում, որ զբոսաշրջիկները գերադասում են վարձակալել բնակարաններ, քան հյուրանոցում մնալ, հատկապես քաղաքի կենտրոնում»:
Վաճառքի առումով իրադրության «կայունությունը», երբ ոչ մի դրական փոփոխություն չկա, կորպորացիայի նախագահը պայմանավորեց տարբեր գործոններով: Ըստ նրա՝ փոփոխության համար պետք է բիզնես ակտիվություն նկատվի, ներդրումային միջավայրն ավելի բարենպաստ դառնա, բանկային ոլորտը լուրջ աջակցություն ցուցաբերի, ինչը չկա. «Նույն խստությամբ մոտեցումները պահպանվում են: Բանկային տոկոսադրույքներն այնպես են հաշվարկված, որ ոչ մի խնդիր բանկերում չլինի: Միայն 100% երաշխիքի դեպքում են վարկավորում: Իսկ դա, երբ ռիսկը չափից ավելի գերագնահատված է, թույլ չի տալիս, որ բիզնեսը զարգանա, որովհետև բիզնեսն իր մեջ ռիսկայնություն միշտ պետք է պարունակի»: Նրա խոսքվ՝ երաշխիքների տարբեր ձևեր կան, որ կարող է կառավարությունը տալ և պարտադիր չէ, որ դրանք գումարային լինեն. «Կարող են մոտեցումները մեղմել և որոշ ռիսկեր վերցնել իրենց վրա: Պետական քաղաքականությունը պետք է խթանիչ դեր ունենա»:
Թե ինչպես է ազդել կառավարության փոփոխությունն անշարժ գույքի շուկայի վրա, դեռ վաղ է խոսել: Հ.Բաղդասարյանը նշեց, որ անշարժ գույքն իր բնույթով վերջինն է արձագանքում տնտեսության աշխուժացմանը, չնայած առաջինն է արձագանքում վատթարացմանը. «Եթե տնտեսությունն իրոք ակտիվանա, բիզնես և ներդրումային միջավայրի բարվոք պայմաններ ստեղծվեն, որոշակի ժամանակ անց, երբ հաստատվի կայունությունը, կարելի է փոփոխություններ սպասել: Ներդրումները կայունություն են պահանջում: Օրինակ՝ արտերկրի մեր գործընկերները պարբերաբար ճշտում են ՀՀ-ում տեղի ունեցող փոփոխությունները հարկային, մաքսային ու դատական, նաև բանկային համակարգերի հետ կապված, որոնք փոխկապակցված են և բիզնես միջավայրի ձևավորման առումով առաջին պայմաններն են: Կառավարության փոփոխությունը 100 օրվա ընթացքում չի կարող դեռ արձագանք ունենալ, ժամանակ է պահանջվում, չնայած ժամանակային առումով ավելի համարձակ քայլեր են պետք և´ բանկային, և´ հարկային, և´ մաքսային ոլորտներում: Քայլեր արվում են, բայց արդյունք է պետք»:
Հարցին՝ միտումներ նկատո՞ւմ եք, որոնք ապագայում կազդեն նաև անշարժ գույքի շուկայի վրա, Հ.Բաղդասարյանը պատասխանեց. «Հույսեր ունենք, ես միշտ լավատես եմ, բայց այդ հույսը կարող է դսռնալ իրականություն, եթե այդ դրական փոփոխությունների կուրսը հաստատուն կերպով շարունակվի, փորձարկումներ չլինեն: Երբ գործընթացները կանգնեն, հույսը մի վայրկյանում կչորանա: Ամեն հաջորդ ժամանակշրաջնում ավելի հետաքրքիր և դրական մոտեցումներ պետք է լինեն, քան նախորդում, որ ավելի լայն մասսաների մոտ հույս ու վստահություն առաջանա, որ փոփոխությունները շարունակական են»:
