Ակցիայի մասնակիցները հայտարարեցին, որ մնում են գիշերելու Բաղրամյան 26-ի դիմաց (լուսանկարներ)
![](https://168.am/wp-content/uploads/2014/06/Akcia-Naxagahakan-2.jpg)
Այս պահին ՀՀ նախագահի նստավայրի դիմացի մայթեզրին բողոքի ակցիա են իրականացնում Վարդենիսի տարածաշրջանի Տրետուք համայնքի մի խումբ բնակիչներ, ովքեր պահանջում են վերանայել Տրետուքում երեկ տեղի ունեցած համայանքապետի ընտրությունների արդյունքները: Գյուղացիները 168.am-ին հայտնեցին, որ ընտրություններին մասնակցել են երկու թեկնածուներ՝ գործող գյուղապետ ի սկզբանե ԲՀԿ-ից առաջադրված Ալիկ Եղիազարյանը և ՀՀԿ-ից առաջադրված Հովհաննես Երանոսյանը: Ըստ գյուղացիների՝ երբ Եղիազարյանն իմացել է, որ Երանոսյանը ՀՀԿ-ի թեկնածուն է, այնպես է արել, որ ինքը հանդես գա որպես ՀՀԿ-ի թեկնածու, իսկ Երանոսյանին սկսել են կոչել թաղային հեղինակություն:
Ընտրությունների արդյունքում 17 ձայնով առաջատար է եղել Երանոսյանը, բայց Սևանի տեղական ընտրական հանձնաժողովը վերահաշվարկի արդյունքում հաղթող է հայտարարել գործող գյուղապետին, ով, ինչպես գյուղացիներն են պնդում, համայնքում նույնիսկ տուն չունի և չի բնակվում այնտեղ: Եղիազարյանի եղբայրն ու իր կողմնակիցները գյուղում մի քանի անգամ ծեծկռտուք են կազմակերպել, ահաբեկել ընտրողներին, նույնիսկ ծեծել են հանձնաժողովի անդամներից մեկին:
Բողոքի ակցիայի մասնակիցներից 4-ին ընդունել է ՀՀ նախագահի աշխատակազմի Քաղաքացիների ընդունելության, առաջարկությունների, դիմումների և բողոքների բաժնի վարիչ Աիդա Ասատրյանը, ով դուրս եկավ ակցիայի մասնակիցների մոտ և հայտարարեց, որ ընտրությունների արդյունքները բողոքարկվել են և ԿԸՀ-ն ուսումնասիրություն է իրականացնում:
«Մեր իրավունքը ոտնահարվել է, մի քիչ էլ ամոթ է, հայ ենք»,- ասաց տեղական ընտրական հանձնաժողովի անդամ Սերգեյ Քոչարյանը՝ հայտարարելով, որ Սևանի հանձնաժողվը խախտումներով է հաղթող գրանցել:
Ակցիայի մասնակիցները հայտարարեցին, որ մնում են գիշերելու Բաղրամյան 26-ի դիմաց:
Լուսանկարները՝ 168.am-ի