Մեզ անհրաժեշտ է ԱՄՆ-ի ու Եվրոպայի հետ անվտանգության նոր միություն. Պորոշենկո
Գերմանական Bild պարբերականին տված հարցազրույցի ժամանակ Ուկրաինայի նորընտիր նախագահ Պյոտր Պորոշենկոն հայտարարել է, որ երկիրը կարիք ունի անվտանգության մասին ԱՄՆ-ի ու ԵՄ-ի հետ նոր համաձայնագրեր ստորագրելու՝ ապահովելու համար իր ռազմական պաշտպանությունը:
Պորոշենկոն այդ կերպ է պատասխանել ՆԱՏՕ-ին Ուկրաինայի հնարավոր անդամակցության մասին հարցին: Պորոշենկոն կարծում է, որ ՆԱՏՕ-ին անդամակցելը պետք է հավանության արժանանա երկրի քաղաքացիների մեծ մասի կողմից, սակայն ներկա դրությամբ չկա այդպիսի մեծամասնություն.
«Ընդհանուր առմամբ մեզ անհրաժեշտ է ԱՄՆ-ի ու Եվրոպայի հետ անվտանգության նոր միություն, որպեսզի նրանք Ուկրաինան պաշտպանեն ռազմական միջոցներով: Ես՝ որպես նախագահ, պայքարելու եմ այդպիսի միության ստեղծման համար ու անհապաղ կսկսեմ բանակցությունները»:
Հիշեցնենք, որ նախընտրական կամպանիայի ժամանակ Պորոշենկոն դեմ էր արտահայտվել ՆԱՏՕ-ին Ուկրաինայի անդամակցելու վերաբերյալ հանրաքվեի անցկացմանը և միաժամանակ կողմ էր արտահայտվել ԵՄ-ին Ուկրաինայի անդամակցելու վերաբերյալ հանրաքվեի անցկացմանը:
