Ռասմուսենը մասնակիորեն է հաստատել Ուկրաինայի սահմանից ռուսական զորքերի հեռանալը
Lenta.ru-ի փոխանցմամբ՝ ՆԱՏՕ-ի գլխավոր քարտուղար Անդերս Ֆոգ Ռասմուսենը նկատել է Ուկրաինայի հետ սահմանին ռուսական ռազմական ստորաբաժանումների որոշակի ակտիվություն: Այս մասին Ռասմուսենը գրել է Twitter-ի իր միկրոբլոգում.
«Մենք ուկրաինական սահմանի մոտ տեսել ենք ռուսական ստորաբաժանումների սահմանափակ ակտիվություն: Կարելի է ենթադրել, որ այդ ուժերի մի մասը պատրաստվում է հեռանալ»: Ռասմուսենը, սակայն, դեռ վաղ է համարում այդ հարցում եզրակացություններ կատարելը.
«Ես հուսով եմ, որ դա ամբողջական ու իրական դուրս բերման սկիզբն է: Ավելի վաղ ծավալված ռուսական զորքերի մեծ մասը շարունակում է մնալ Ուկրաինայի սահմանի մոտ: Մենք տեսնում ենք զորավարժությունների շարունակում»: Ռասմուսենն ընդգծել է, որ Ուկրաինայի սահմանից ռուսական զորքերի քաշվելը կհանդիսանա ճիշտ ուղղությամբ Ռուսաստանի առաջին քայլը:
