Շանհայան գագաթաժողովի ամփոփիչ փաստաթղթում խոսք է գնում նաև ԼՂ-ի խնդրի կարգավորման մասին
Ադրբեջանական APA լրատվական գործակալության փոխանցմամբ՝ Շանհայան գագաթաժողովն ավարտվել է ամփոփիչ փաստաթղթի ընդունմամբ, որում արտացոլված են բազմաթիվ հարցեր: Դրանում խոսք է գնում նաև Ղարաբաղյան հակամարտության կարգավորման մասին.
«Մենք աջակցում ենք այդ հակամարտությունը խաղաղ ճանապարհով կարգավորելուն՝ հենցված միջազգային իրավունքի նորմերի շրջանակներում ընդունված որոշումների ու փաստաթղթերի վրա: Այդ նպատակով մենք ԵԱՀԿ Մինսկի խմբին կոչ ենք անում ակտիվացնել ջանքերը հակամարտության կարգավորման ուղղությամբ»:
Ուկրաինայում տիրող իրավիճակի մասին կետը սակայն դուրս է մնացել Ասիայում փոխգործակցության ու վստահության միջոցների խորհրդաժողովի (CICA) չորրորդ գագաթաժողովի արդյունքների հռչակագրից: Այդ մասին հայտարարել է ՌԴ ԱԳՆ-ի՝ Ասիա-խաղաղօվկիանոսյան դեպարտամենտի ղեկավար Բախտիեր Խակիմովը:
Նա ընդգծել է, որ ամփոփիչ փաստաթղթում Ուկրաինայի իրավիճակի մասին կետ ներառելու առաջարկով հանդես է եկել Թուրքիան, սակայն դա մերժվել է, Ռուսաստանը դեմ է արտահայտվել դրան, քանի որ Ուկրաինան չի հանդիսանում CICA-ի անդամ՝ ունենալով միայն դիտորդի կարգավիճակ:
