Վրաստանի կառավարության համար ամենացավոտ խնդիրները տնտեսությունն ու գործազրկությունն են. Մարգվելաշվիլի
Վրացական «Իմեդի» հեռուստաընկերության փոխանցմամբ՝ Վրաստանի նախագահ Գեորգի Մարգվելաշվիլին հայտարարել է, որ Վրաստանի կառավարության համար ամենացավոտ խնդիրները տնտեսությունն ու գործազրկությունն են:
Մարգվելաշվիլին համոզվածություն է հայտնել, որ հունիսի 15-ին Վրաստանում կայանալիք ՏԻՄ ընտրություններում հաղթանակ է տանելու «Վրացական երազանք» դաշինքը, և որ Դատո Նարմանին կդառնա Թբիլիսիի քաղաքապետ:
Խոսելով Ռուսաստանի հետ հարաբերությունների մասին՝ Մարգվելաշվիլին հայտարարել է, որ Վրաստանին հաջողվում է հավասարակշռված արտաքին քաղաքականություն վարել այդ երկրի նկատմամբ.
«Կարծում եմ, որ Վրաստանի արտաքին քաղաքականությունը հաջող է, քանի որ երկիրը Ռուսաստանի հանդեպ վարում է հավասարակշռված քաղաքականություն, և դա արժանանում է հավանության»:
Մարգվելաշվիլին ընդգծել է, որ 2014 թվականի առաջին եռամսյակի ցուցանիշները վկայել են, որ էականորեն աճել է Վրաստանի ու Ռուսաստանի միջև ապրանքաշրջանառության ծավալը:
