Պրահայում մեկնարկում է «Արևելյան գործընկերության» երկօրյա գագաթաժողովը
Ռուսական РИА Новости լրատվական գործակալության փոխանցմամբ՝ Չեխիայի մայրաքաղաք Պրահայում այսօր մեկնարկում է ԵՄ-ի «Արևելյան գործընկերություն» ծրագրին մասնակից երկրների (Հայաստան, Ուկրաինա, Մոլդովա, Բելառուս, Վրաստան և Ադրբեջան) երկօրյա գագաթաժողովը: Այս մասին հայտնել է Չեխիայի նախագահ Զեմանի մամուլի ծառայությունը:
Տվյալ ծրագրի շրջանակներում առաջին գագաթաժողովը նույնպես անցկացվել է Պրահայում՝ 2009 թվականի մայիսին: «Արևելյան գործընկերության» վերջին գագաթաժողովն անցկացվել է նախորդ տարվա նոյեմբերին, Վիլնյուսում:
Չեխիայի նախագահի տարածած հայտարարության մեջ նշված է, որ Ուկրաինայի դրամատիկ իրադարձություններն իրեն համոզել են, որ «Արևելյան գործընկերության» նախագծի շարունակումը չափազանց կարևոր է ԵՄ-ի ու նրա արևելյան հարևանների միջև համագործակցության զարգացման համար:
