Թուրքիան ու ԱՄՆ-ը մասնակից են Սիրիայում իրականացված քիմիական հարձակումներին. Դամասկոս
Ռուսական РИА Новости լրատվական գործակալության փոխանցմամբ՝ Դամասկոսը նոր տվյալներ է գտել ահաբեկչական խմբավորումների զինյալների կողմից Սիրիայի խաղաղ բնակչության ու կառավարական բանակի դեմ քիմիական թունավոր նյութեր կիրառելու մասին:
Այս մասին երեկ հայտարարել է Սիրիայի փոխարտգործնախարար Ֆեյսալ Միկդադը, ով Դամասկոսում հանդիպել է ՄԱԿ-ի ու Քիմիական զենքն արգելող կազմակերպության համատեղ առաքելության ղեկավար Զիգրիդ Կաագի հետ:
Միկդադի խոսքերով՝ Հալեպի նահանգում, Դամասկոսի արվարձանում և երկրի այլ վայրերում իրականացված քիմիական այդ հարձակումներին մասնակցել են նաև տարածաշրջանային ու միջազգային մի շարք երկրներ, այդ թվում նաև Թուրքիան ու ԱՄՆ-ը:
Միկդադը կեղծիք է որակել այն տեղեկությունները, թե սիրիական բանակը սկսել է երկրի տարբեր շրջաններում կիրառել թունավոր նյութեր:
