ՆԱՏՕ-ի 5 ռազմանավ շարժվել է Բալթիկ ծովի ուղղությամբ
Ամերիկյան Associated Press լրատվական գործակալության փոխանցմամբ՝ ՆԱՏՕ-ի 5 ռազմանավ երեկ շարժվել են Բալթիկ ծովի ուղղությամբ՝ ուժեղացնելու համար իր արևելաեվրոպական դաշնակիցների պաշտպանունակությունը Ռուսաստանի ու Ուկրաինայի միջև լարվածության ֆոնին:
Նորվեգիային, Նիդերլանդներին, Բելգիային ու Էստոնիային պատկանող երեք տրալչիկ, մեկ ականադիր ու մեկ ապահովման նավ դուրս են եկել Գերմանիայի Քիլ նավահանգստից և շարժվել են Բալթիկ ծովի ուղղությամբ՝ զորավարժություններին մասնակցելու համար, որոնք կտևեն մինչև մայիսի վերջ:
Նավերը մտնելու են բալթյան մի շարք նավահանգիստներ, ինչպես նաև մասնակցելու են երկու համաշխարհային պատերազմներից մնացած ականների վնասազերծման գործողությանը, ինչը պլանավորված է եղել նախապես:
Ապրիլի 16-ին ՆԱՏՕ-ի Խորհուրդը Բրյուսելում հավանության է արժանացրել Արևելյան Եվրոպայում դաշինքի անդամ երկրների անվտանգության մեծացման միջոցների փաթեթը՝ կապված Ուկրաինայում տիրող իրավիճակի հետ:
