Մարտունում հայտնի «Պլյաժը» կվերականգնվի
«Մարտունու երբեմնի մարդաշատ զբոսանքի եւ հանգստի վայրը՝ լճակով պուրակը կամ մարտունեցիներին հայտնի «Պլյաժը» մոտ ապագայում նորից կդառնա քաղաքացիների հպարտությունը»,- այս մասին Karabakh-open.info-ի հետ զրույցում հայտնել է Մարտունու քաղաքապետ Մհեր Խաչատրյանը՝ հույս հայտնելով, որ այն կդառնա բոլորի ամենասիրելի ժամանցային վայրը։
Պուրակի կառուցումը «Մարտունու վերակառուցման եւ զարգացման հիմնադրամ»-ի անդրանիկ նախագիծը կլինի քաղաքում: Ինչպես նշում է հիմնադրամի գործադիր տնօրեն Մհեր Խաչատրյանը՝ աշխատանքները վաղուց պիտի սկսեին, սակայն պուրակի սեփականաշնորհման հետ կապված որոշակի խնդիրներ էին առաջացել, որոնք վերջերս են վերջնականապես լուծվել:
Քաղաքապետի վստահեցմամբ՝ շատ շուտով վերակառուցման աշխատանքները կսկսեն։
«Քաղաքի բարեկարգման միամսյակի շրջանակներում երիտասարդների, քաղաքի բնակչության, կոմունալ տնտեսության համատեղ ուժերով տարածքի սանմաքրումը կկատարվի ու տարածքը վեր կածվի շինհարթակի»,- ասում է քաղաքապետը՝ ավելացնելով, որ հիմնադրամի նվիրատուները, ովքեր հիմնականում հանրապետությունից դուրս բնակվող մարտունեցիներ են հանդիսանում, հորդորում են անմիջապես սկսել աշխատանքները։ Այս ամենով հանդերձ քաղաքապետը աշխատանքների ավարտման ժամկետ դժվարանում է նշել, քանի որ նախագծով նախատեսվածը կառուցելու համար անհրաժեշտ ողջ գումարը դեռեւս չկա, «սակայն աշխատանքները սկսելու համար գումարը բավականացնում է»։
