Զինծառայող Արման Ղուկասյանի մահվան փաստով ձերբակալված անձինք չկան
Մարտի 19-ին Լեռնային Ղարաբաղում մահացած զինծառայող Արման Ղուկասյանի մահվան փաստով հարուցված քրեական գործի շրջանակներում ձերբակալված անձինք չկան: Այս մասին 168.am-ին տեղեկացրեց ՀՀ ՊՆ քննչական ծառայության ավագ սպա Մերի Սարգսյանը:
Զինծառայողի մահվան փաստով քրեական գործ է հարուցվել ՀՀ 365-րդ հոդվածի 3-րդ մասով՝մարտական հերթապահություն կամ մարտական ծառայություն կրելու կանոններ խախտելը, որն առաջացրել է ծանր հետևանքներ, կատարվում է նախաքննություն:
ԼՂՀ ՊՆ մամուլի ծառայությունն այսօր հաղորդագրություն էր տարածել, որ ղարաբաղա-ադրբեջանական հակամարտ զորքերի շփման գծի հյուսիսային ուղղությամբ տեղակայված զորամասերից մեկի պահպանության տեղամասի մարտական հենակետում մարտական խնդիր կատարելու ժամանակ մահացու հրազենային գնդակային վիրավորում է ստացել զինծառայող, 1994թ. ծնված Արման Արտյուշայի Ղուկասյանը:
