Օբաման Թունիսի վարչապետին հրավիրել է Վաշինգտոն
Ռուսական ИТАР-ТАСС լրատվական գործակալության փոխանցմամբ՝ ԱՄՆ նախագահ Բարաք Օբաման հեռախոսազրույց է ունեցել Թունիսի վարչապետ Մեհդի Ջոմաայի հետ: Այս մասին երեկ հայտնել է Սպիտակ տունը:
Հեռախոսազրույցի ժամանակ Օբաման Թունիսի վարչապետին շնորհավորել է երկրում նոր Սահմանադրություն ընդունելու և նոր կառավարություն ձևավորելու կապակցությամբ: Օբաման ողջունել է Թունիսի հեղափոխությունից հետո այդ երկրի իշխանությունների գործադրած ջանքերը՝ կապված հեղափոխության ձեռքբերումները պահպանելու նրանց ձգտման հետ:
Օբաման Մեհդի Ջոմաային այս տարվա երկրորդ կեսին հրավիրել է Վաշինգտոն, ինչը միտված կլինի երկու երկրների հարաբերությունների զարգացմանը:
