Ակտիվիստներին բերման են ենթարկել Ազատության հրապարակից (լուսանկարներ)
Քիչ առաջ Ազատության հրապարակից ոստիկանական բաժանմունքներ բերման են ենթարկվել մի քանի ակտիվիստներ: Ինչպես հայտնի է՝ «Բանակն իրականում» նախաձեռնությունւ այսօր՝ Բանակի օրը, բողոքի ակցիա է կազմակերպել:
Հիշեցնենք, որ Օպերայի և բալետի ազգային ակադեմիական թատրոնում այս պահին տեղի է ունենում բանակի 22-րդ տարեդարձին նվիրված տոնական միջոցառում:
168.am-ի տեղեկություններով՝ բերման են ենթարկվել նաև «Բանակն իրականում» նախաձռնության անդամ Արա Նոդոլյանն ու ակտիվիստ Վարդգես Գասպարին:
epress.am-ի փոխանցմամբ՝ ոստիկանության աշխատակիցները թույլ չեն տվել «Բանակն իրականում» նախաձեռնության անդամներին և բանակում խաղաղ պայմաններում զոհված զինծառայողների 4 մայրերին մոտենալ Օպերայի և բալետի թատրոնի շենքին, որտեղ ժամը 17։00-ից Հայոց բանակի կազմավորման 22-ամյակի կապակցությամբ տոնական համերգ է անցկացվում։
Ոստիկանները պատ են կազմել՝ թույլ չտալով, որպեսզի բողոքողները մոտենան շենքի մուտքին։
Ըստ կայքի՝ բանակում խաղաղ պայմաններում զոհված զինծառայող Վալերի Մուրադյանի մայրը՝ Նանա Մուրադյանը, փորձել է ճեղքել ոստիկանների պատը, սակայն նրան հրելով հետ են շպրտել։
Ավելի ուշ, երբ ակցիայի մասնակիցները փորձել են օպերայի շենքին մոտենալ Մաշտոցի պողոտայի կողմից, նրանց նկատմամբ ուժ են կիրառել, հրել ու քաշքշել։
