Ակնհայտ է Ուկրաինայի ներքին գործերին արտաքին միջամտությունը. Պեսկով
Ռուսական Комсомольская правда թերթին տված հարցազրույցի ժամանակ Ռուսաստանի նախագահ Վլադիմիր Պուտինի մամլո քարտուղար Դմիտրի Պեսկովն ակնհայտ է համարել Ուկրաինայի իրադարձություններին օտար երկրների ներկայացուցիչների ցուցաբերած միջամտությունը.
«Մենք իհարկե ցավում ենք և չենք կարողանում հասկանալ, երբ ակնհայտ է դառնում արտաքին միջամտությունն այն ներքին գործընթացներին, որոնք տեղի են ունենում Կիևում: Կատարելապես չենք կարողանում հասկանալ, որ Կիևում աշխատող օտար երկրների դեսպանները երբեմն խոսում են այն մասին, թե ինչ պետք է անեն Ուկրաինայի իշխանությունները, թե նրանք որտեղից պետք է դուրս բերեն ներքին զորքերը, ոստիկանությանը և այլն:
Անկասկած է, որ Ռուսաստանն ու Ուկրաինան եղբայրական պետություններ են և մեր երկիրը ցավով ու հուզումով է հետևում այն ամենին, ինչ տեղի է ունենում Կիևում: Մեզ համար բացարձակապես անթույլատրելի է ներքին գործերին միջամտելը: Մենք համոզված ենք, որ Կիևում գիտեն, թե ինչ անել և ինչպես գտնել լավագույն հանգուցալուծումը, որպեսզի կարգավորվի իրավիճակը»:
