Իրաքի ծայրահեղականները ժողովրդից փող են խնդրել՝ ջիհադ իրականացնելու համար
Ամերիկյան Associated Press լրատվական գործակալության փոխանցմամբ՝ «Լևանտում և Իրաքում իսլամական պետություն» (ISIL) ծայրահեղական խմբավորումն օգնության խնդրանքով դիմել է Անբար նահանգի Ֆալուջա քաղաքի բնակիչներին:
Ականատեսները գործակալությանը պատմել են, որ ծայրահեղականները քաղաքի խաչմերուկներում բաժանում են թռուցիկներ, որոնցում տեղի բնակիչներին խնդրում են օգնել գումարով՝ «ջիհադ» իրականացնելու համար: Բացի այդ, նրանք տեղաբնակներին խնդրել են զինյալներին տեղ տալ իրենց տներում, ուր նրանք կկարողանան գիշերել ու հանգստանալ:
Ներկայումս Ֆալուջայում իրավիճակը վերահսկում են տեղի սուննի ցեղերը, որոնք որոշակի տվյալներով համագործակցում են ISIL-ի հետ: Քաղաքի շուրջ կենտրոնացել են կառավարական զորքերը, որոնք արդեն իսկ Ֆալուջայի բնակիչներին զգուշացրել են հնարավոր գրոհի մասին:
Անբար նահանգի խոշորագույն քաղաքներում իշխանությունն անցել է այնտեղ բնակվող սուննիների ձեռքը, ինչը հնարավոր է դարձել այս տարվա սկզբին նրանց բարձրացրած ապստամբության շնորհիվ:
