Ուրմիա լճի վերականգնումը կպահանջի 10-15 տարի. Իրանի էներգետիկայի նախարար
Իրանական Mehr լրատվական գործակալության փոխանցմամբ՝ Ուրմիա լճի վերականգնումը կտևի 10-15 տարի: Այս մասին հայտարարել է Իրանի էներգետիկայի նախարար Համիդ Չիթչիանը. «Ուրմիա լճի վերականգնման վերաբերյալ արված քաղաքական ու գովազդային հայտարարություններն իրատեսական չեն, դատարկ խոստումներ են:
Դա անարդար է (լճի մերձակայքում բնակվող) մարդկանց հանդեպ: Ուրմիա լճի չորացման հիմնական պատճառը մերձակա գյուղատնտեսական շրջանների անվերահսկելի զարգացումն է: Եթե չհաջողվի արժանիորեն վերահսկել գյուղատնտեսական կարիքների համար ջրի սպառումը, ապա Ուրմիա լիճը երբեք էլ չի վերականգնվի:
Ուրմիա լճի շրջակայքում գյուղատնտեսական շրջանների ընդհանուր տարածքը վերջին տարիներին 150.000 հեկտարից աճել է մինչև 480.000 հեկտարի: Ուրմիա լճի չորացման պատճառներից մեկն էլ կլիմայական փոփոխություններն են: Օդի տարեկան միջին ջերմաստիճանն աճել է 1-2 աստիճանով, միևնույն ժամանակ նվազել է տարեկան տեղումների քանակը»:
