Ուկրաինան Ռուսաստանի հետ չի պայմանավորվել խոշոր վարկի տրամադրման շուրջ. Նիկոլայ Ազարով
Բրիտանական Reuters լրատվական գործակալության փոխանցմամբ՝ Ուկրաինայի վարչապետ Նիկոլայ Ազարովը հայտարարել է, որ Կիևը որևէ պայմանավորվածություն չունի Ռուսաստանի հետ՝ կապված նոր վարկեր տրամադրելու հետ:
Պատասխանելով Ռուսաստանի ու Ուկրաինայի միջև նոր վարկերի շուրջ պայմանավորվածություն լինելու վերաբերյալ գործակալության հարցին՝ Ազարովը հայտարարել է, որ բնականաբար այդպիսի բան չկա:
Այն բանից հետո,ինչ Ուկրաինայի կառավարությունը նախորդ շաբաթ կասեցրեց ԵՄ-ի հետ Ասոցացման համաձայնագիր ստորագրելու նախապատրաստական գործընթացը, ԶԼՄ-ներում տեղեկություններ ի հայտ եկան, որ Ռուսաստանն Ուկրաինային խոստացել է խոշոր վարկ:
Ուկրաինական «Բատկիվշչինա» խորհրդարանական ընդդիմադիր խմբակցության առաջնորդ Արսենիյ Յացենյուկը հայտարարել էր, թե Ուկրաինայի նախագահ Վիկտոր Յանուկովիչը Ռուսաստանի հետ պայմանավորվել է ԵՄ-ի հետ Ասոցացման համաձայնագիր չստորագրելու դիմաց 20 միլիարդ դոլարի փոխհատուցում: Սակայն Նիկոլայ Ազարովը նոյեմբերի 24-ին հերքել էր այդ տեղեկատվությունը:
