Էրդողանի կուսակցությունն օնլայն-ակտիվիստների բանակ է ձևավորում` սոցցանցերում գործելու համար
Ամերիկյան The Wall Street Journal պարբերականի փոխանցմամբ` Թուրքիայում իշխող «Արդարություն ու զարգացում» կուսակցությունը (ԱԶԿ) հայտարարել է կամավորների թիմի ստեղծման մասին, որոնք կդառնան կուսակցության ներկայացուցիչները սոցցանցերում:
Թիմի անդամների պարտականությունների թվում պետք է լինեն Facebook և Twitter սոցցանցերում կուսակցության դիրքորոշումն առաջ տանելը, ինչպես նաև համացանցում տարվող քաղաքական քննարկումները մոնիթորինգի ենթարկելը:
Նախաձեռնության հեղինակներից մեկը հայտարարել է, որ երբ ընդդիմության ներկայացուցիչները համացանցում կեղծ տեղեկատվություն կտարածեն իշխող կուսակցության մասին, իրենք անմիջապես կուղղեն նրանց:
Ընդհանուր առմամբ, պլանավորված է իշխանական օնլայն-ակտիվիստների թիմում հավաքել 6000 մարդ, որոնցից յուրաքանչյուրն աշխատանքի անցնելուց առաջ հատուկ դասընթացների շարք կանցնի Անկարայում: Ծրագրի մասնակիցների անունները չեն հրապարակվում:
Սոցցանցերը դարձել են այս տարվա հունիսից Թուրքիայում շարունակվող բողոքի զանգվածային ակցիաների կազմակերպման հիմնական եղանակներից մեկը:
