ՀՊՃՀ-ում օգոստոսի 10-ից սկսվում է հեռակա ուսուցման դիմում-հայտերի ընդունումը

Հայաստանի պետական ճարտարագիտական համալսարանը (Պոլիտեխնիկ), համաձայն ՀՀ ԿԳ նախարարի 2012թ. հուլիսի 27-ի «ՀՀ պետական բուհերի հեռակա ուսուցման ընդունելության կանոնները հաստատելու մասին» թիվ 753-Ն հրամանի և ՀՀ ԿԳ նախարարի 2013թ. օգոստոսի 5-ի «ՀՀ պետական բուհերի 2013 թ. հեռակա ուսուցման ընդունելության մասնագիտությունների ցանկն ըստ բուհերի, ընդունելության քննությունների և տեղերի հաստատելու մասին» թիվ 1011-Ա/Ք հրամանի, հայտարարում է բակալավրի կրթական ծրագրով 2013-2014 ուստարվա հեռակա ուսուցման ընդունելություն:

Համալսարան վճարովի մրցութային հիմունքներով հեռակա ուսուցմամբ կարող են ընդունվել միջնակարգ, նախնական մասնագիտական և միջին մասնագիտական կրթություն ունեցող անձինք` առանց տարիքի սահմանափակման:

Պարտադիր ժամկետային զինվորական ծառայությունից զորացրված դիմորդները քննությունները դրական միավորներով հանձնելու դեպքում բուհ են ընդունվում մրցույթից դուրս, ըստ մասնագիտությունների նախարարության կողմից հաստատված տեղերի:

Քննությունները կանցկացվեն սեպտեմբերի 25-ից մինչև հոկտեմբերի 20-ը ընկած ժամանակահատվածում՝ քննաթերթով նախատեսված օր(եր)ին համապատասխան:

Քննությունների արդյունքում մրցույթային հավասար միավորների դեպքում ըստ հերթականության առավելություն կտրվի`

տվյալ մասնագիտությամբ աշխատող դիմորդներին,
բոլոր տարիների մեդալակիր դիմորդներին,
դպրոցականների հանրապետական առարկայական օլիմպիադաների առաջին կարգի դիպլոմ ստացած դիմորդներին,
բուհի կողմից նշված առաջին մրցութային քննությունից առավել բարձր միավոր ստացած դիմորդներին,
դպրոցի պետական ավարտական քննություններից առավելագույն միջին գնահատական ունեցող դիմորդներին,
տվյալ մասնագիտությանը համապատասխան միջին մասնագիտական կրթություն ստացած դիմորդներին:

Դիմորդների փաստաթղթերն ընդունվում են մինչև 2013թ. սեպտեմբերի 20-ը՝ յուրաքանչյուր օր (բացի շաբաթ և կիրակի օրերից) ժամը 10:00-ից մինչև 17:00-ն:

2013-2014 ուստարվա բակալավրի կրթական ծրագրով հեռակա ուսուցման մասնագիտությունների ցանկին և պահանջվող փաստաթղթերի ցանկին կարելի է ծանոթանալ` այցելելով ՀՊՃՀ պաշտոնական կայք` www.seua.am: