Այսօր Ճապոնիայում հարգում են Նագասակիի ատոմային ռմբակոծության զոհերի հիշատակը
Ռուսական ИТАР-ТАСС լրատվական գործակալության փոխանցմամբ՝ Ճապոնիայի Նագասակի քաղաքում այսօր հարգում են 1945 թվականի օգոստոսի 9-ի ատոմային ռմբակոծության զոհերի հիշատակը: Հիշատակման արարողությունն անցկացվելու է քաղաքի կենտրոնում գտնվող Խաղաղության այգում:
Այն մեկնարկելու է տեղական ժամանակով ժամը 11.02-ին. 68 տարի առաջ հենց այդ ժամանակ քաղաքի վրա ընկավ ամերիկյան ատոմային ռումբը: Ողջ Ճապոնիայում հայտարարվելու է լռության րոպե: Ելույթներ են ունենալու Նագասակիի քաղաքապետ Տոմիխիսա Տաուեն, ապա երկրի վարչապետ Սինձո Աբեն:
Միջոցառման վերջում ավանդաբար երկինք են ուղարկվելու սպիտակ աղավնիներ՝ խաղաղության խորհրդանիշներ: Միջոցառմանը մասնակցելու են 47 երկրների դիվանագիտական ներկայացուցչությունների ներկայացուցիչներ:
Հիրոսիմայից հետո Նագասակին դարձավ Ճապոնիայի երկրորդ քաղաքը, որը 1945 թվականի օգոստոսին ենթարկվեց ամերիկյան ատոմային հարձակման: Ուշագրավ է, որ սկզբնական շրջանում մայոր Չառլզ Սուինիի գլխավորած B-29 ռմբակոծիչի թիրախում է գտնվել Կոկուրա քաղաքը, որը գտնվում է Կյուսյու կղզու հյուսիսային հատվածում:
Սակայն հանգամանքների բերումով 1945 թվականի օգոստոսի 9-ի առավոտյան Կոկուրայի երկնքում գրանցվել է ուժեղ ամպամածություն, ինչի պատճառով էլ Սուինին որոշել է ինքնաթիռն ուղղել հարավ-արևմուտք և ուղղվել Նագասակի:
Այստեղ եղանակը նույնպես բարենպաստ չի եղել, և այնուամենայնիվ որոշվել է քաղաքի վրա նետել «Հաստլիկ» անունը ստացած ատոմային ռումբը: Այն իր հզորությամբ գրեթե կրկնակի գերազանցել է դրանից երեք օր առաջ Հիրոսիմայի վրա նետված ատոմային ռումբին:
Սակայն ոչ դիպուկ նշան բռնելը և տեղանքի ռելիեֆի առանձնահատկությունը որոշակիորեն նվազեցրել են պայթյունի պատճառած վնասի չափը: Եվ այնուամենայնիվ, ատոմային ռմբակոծության հետևանքները եղել են աղետալի. Նագասակիում ակնթարթորեն զոհվել է ավելի քան 70.000 մարդ, քաղաքը գործնականում ջնջվել է երկրի երեսից:
Հետագա տարիներին աղետի զոհերի ցանկը շարունակել է համալրվել ճառագայթումից մահացածներից հաշվին, ինչի հետևանքով ներկա դրությամբ մահացածների քանակը կազմել է ավելի քան 152.000 մարդ:
Այդ ամենը վերապրածներին Ճապոնիայում անվանում են «խիբակուսյա» (ռմբակոծությունից տուժած մարդ), որոնք ցայժմ տառապում են ռադիացիոն ճառագայթումից առաջացած հիվանդություններից:
Ճապոնիայի կառավարության տվյալներով՝ ներկայումս երկրում «խիբակուսյաների» ընդհանուր քանակը կազմում է ավելի քան 201.000 մարդ:
Հիշեցնենք, որ այս տարվա մայիսի վերջին ամերիկյան Foreign Policy պարերականը գրեց, որ 1945 թվականին Ճապոնիային հաղթել է ոչ թե ամերիկյան ատոմային ռումբը, այլ` Ստալինը:
