Մաշտոցի պուրակում տեղի ունեցավ քննարկում, իսկ Վազգեն Մանուկյանը նախանձեց «հեղափոխական ոգևորությանը»
Ինչպես արդեն տեղեկացրել ենք, այսօր Մաշտոցի պուրակում քաղաքային տրանսպորտի հիմնախնդրի շուրջ տեղի ունեցավ բաց քննարկում, որին մասնակցում էին քաղաքացիական ակտիվիստները և Հանրային խորհուրդը` Վազգեն Մանուկյանի գլխավորությամբ: Ներկա էր նաև «Ժառանգություն» կուսակցության ղեկավար Րաֆֆի Հովհաննիսյանը:
Քննարկմանը ելույթ ունեցան տասնյակ մարդիկ` մասնագետներ, ակտիվիստներ և շարքային քաղաքացիներ, ովքեր արտահայտեցին ամենատարբեր տեսակետներ` հասարակական տրանսպորտի սակագնի, քաղաքացիական շարժման և Հայաստանում քաղաքական և տնտեսական վիճակի մասին:
Մասնավորապես «Քաղաքացիական դիրքորոշում» հ/կ-ի ղեկավար Գևորգ Դուստուրյանը նշեց, թե այն հանգամանքը, որ տրանսպորտի ոլորտում, ինչպես հայտարարել է Երևանի քաղաքապետարանը, տեղի է ունեցել ավտոպահեստամասերի թանկացում, ինչն ազդել է ուղեվարձի ինքնարժեքի վրա, որևէ մեկի համար գաղտնիք չէ, սակայն դա չի նշանակում, որ դրա հետևանքով քաղաքապետարանը պետք է ընդուներ որոշում, որը հաստատեր նոր սակագին, քանի որ նման գործելաոճը, ըստ նրա՝ հատուկ է «մանր չինովնիկներին», այլ պետք էր գտնել լուծում:
«Մենք առաջարկել ենք մեր լուծումը` ստեղծել մեկ բաժնետիրական ընկերություն, որտեղ կընդգրկվեն նաև նրանց գծատերերը, չնայած այնտեղ կան շատ օդիոզ դեմքեր, բայց ունենք այն, ինչ ունենք: Եվ այդ մեծ կազմակերպության մասշտաբի էֆեկտը հնարավորություն կտար ազդելու ինքնարժեքի վրա և տեղավորվել 100 դրամի սահմաններում: Նույն կերպ գործում են, օրինակ, Բեռլինում, Փարիզում»,- ասաց Գևորգ Դուստուրյանը:
Իսկ Սպառողների միության նախագահ Արմեն Պողոսյանն իր պարտքը համարեց հորդորել. ««Գիծ», «գծատեր» բառերը բռնաբարություն են մեր լեզվի նկատմամբ, հայոց լեզվում «գիծ» և «գծի տեր» բոլորովին ուրիշ բան են նշանակում, և մենք դա արդեն հանդուրժում ենք նորմատիվային լեզվի մեջ, այլևս չլինի, դա «Արգո»` հանցավոր խմբերի կոդավորված լեզու»:
Այնուհետև հավելեց. «Այսօր ես պատիվ եմ ունեցել հրապարակային հայտարարելու, որ մենք անվստահություն ենք հայտարարում և բոլորին ուղարկում ենք տուն, և կարծում եմ, որ Ձեր կարծիքն եմ արտահայտել: Բոլորին ուղարկում ենք տուն` բացի միջազգային գրոսմայստերից»:
Ոչ պակաս արմատական էին ակտիվիստների ելույթները, ովքեր պահանջեցին շարունակել պայքարը` Երևանի տրանսպորտի վարչության պետ Հենրիկ Նավասարդյանին և «Երևանտրանս» ՓԲԸ-ի տնօրեն Միսակ Համբարձումյանին պաշտոնանկ անելու համար: Ակտիվիստները կոչ արեցին նաև վաղը ժամը 12-ին միանալ Երևանի քաղաքապետարանի առջև վրանների տեղադրման ակցիային, որն իրականացվելու է ի պաշտպանություն նստացույցը շարունակող ակտիվիստների: Ակտիվիստներից Գայանե Մելքոնյանը հարկ համարեց ընդգծել, որ, ըստ Հայաստանի մարդու իրավունքների պաշտպանի, բողոքի ակցիա իրականացնելիս` վրանների տեղադրումը չի հակասում օրենքին:
Ի դեպ, Գևորգ Դուստուրյանը Հենրիկ Նավասարդյանի և Միսակ Համբարձումյանի հրաժարականների պահանջի շարքում դրեց նաև Երևանի քաղաքապետ Տարոն Մարգարյանին և ՀՀ տրանսպորտի և կապի նախարար Գագիկ Բեգլարյանին` նշելով, որ վերջիններս նույնպես պետք է պաշտոնանկ արվեն:
«Պարզաբանեմ, թե ինչու Գագիկ Բեգլարյանի…Ասեմ, որ տրանսպորտի հայեցակարգը պետք է մշակի տրանսպորտի նախարարությունը, սակայն վերջինս ոչ մի հայեցակարգ չունի, չնայած որ վաղուց պետք է ունենար: Հետևաբար, այդ անգործունեության համար հեռացնել գործից Գագիկ Բեգլարյանին և Տարոն Մարգարյանին»,- հայտարարեց Գևորգ Դուստուրյանը:
«Հանուն կայուն մարդկային զարգացման» հ/կ-ի նախագահ, Բնապահպանության նախկին նախարար Կարինե Դանիելյանն իր հերթին ողջունեց նախաձեռնությունը` նշելով, որ մեծ հույսեր է կապում «անկախության սերնդի» հետ:
«Իմ խորին համոզմամբ` մենք մեծ փոփոխությունների կարիք ունենք: Այս 100 կամ 150 դրամը մի դրվագ է, և սրանով այս շարժումը պետք է չավարտվի, որովհետև մենք երազում էինք մի այլ երկիր, երբ դուրս եկանք Ազատության հրապարակ` սովետական տանկերի դեմ, բայց ստացվեց մի այլ երկիր: Շատ ցավում եմ, բայց իմ պատկերացմամբ` մենք ստեղծել ենք կրիմինալ, օլիգարխիկ մի պետություն, և հիմա զարմանալի չէ, որ, այսպես կոչված, գծատերերը կարող են այսօր որոշել 150 դրամ, վաղը` 200 դրամ… Կարծում եմ` շատ ճիշտ է ստեղծել մասնագետների խումբ, կազմել օրակարգ, թե ինչ քայլեր պետք է անենք, որպեսզի ամեն օր չվազենք ծառից ծառ, ավտոբուսից ավտոբուս, որպեսզի երկրում գործի օրենքը, և այդ օլիգարխիկ համակարգը փլուզվի»,- նշեց Կարինե Դանիելյանը:
Ավելի շատ սպասում կար Վազգեն Մանուկյանի ելույթին: Մինչ վերջինիս խոսելը՝ մի քանի քաղաքացիներ հասցրեցին նրան կշտամբել` այս քննարկումն ուշացումով կազմակերպելու համար:
«Հաճույքով Ձեզ լսում եմ, երիտասարդներ, չնայած շատ բաներում համաձայն չեմ, բայց, ամեն դեպքում հաճելի է»,- իր խոսքն այսպես սկսեց Հանրային խորհրդի նախագահ Վազգեն Մանուկյանը:
«25 տարի առաջ մենք երիտասարդ էինք, մեր պայքարն ուրիշ տեղ էր. մենք կռվում էինք Քաղբյուրոյի հետ, մենք պայքարում էինք, որ երկիրն անկախություն ստանա, մենք պայքարում էինք ժողովրդավարության, Ղարաբաղի համար, գնում էինք պատերազմ: Եվ շատ բնական է` երբ Ղարաբաղի պատերազմն արդեն հաղթած է, Հայաստանն անկախ պետություն է, պայքարը պետք է գնա երկրի ներսում` կյանքը կարգավորելու համար, և տրանսպորտի խնդիրն այդ հարցերից մեկն է: Այսինքն` ես չեմ ուզում մեծությունը համեմատեմ. կռիվ` Քաղբյուրոյի դեմ, և կռիվ` քաղաքապետարանի դեմ: Ամեն ժամանակ ունի իր խնդիրները, և երիտասարդությունը պետք է լուծի այդ ժամանակվա խնդիրները»,- ասաց նա:
Կոնկրետ տրանսպորտի խնդրի մասին խոսելիս՝ Վազգեն Մանուկյանը հիշեցրեց, որ դեռևս «ցուրտ ու մութ» տարիներին առաջացել էին, այսպես ասած, «փափախ անող» ավտոմեքենաներ, որոնք սպասարկում էին ժողովրդին, իսկ եկամուտն ամբողջությամբ գնում էր տերերի գրպանը:
«Բնական է, որ տերերն իշխանության հետ կապված մարդիկ էին, դա հասկանալի բան է, և դա շարունակվեց մինչև հիմա: Այն, ինչ այժմ կատարվում է, անախրոնիզմ է»,- ասաց Վազգեն Մանուկյանը` առաջարկելով խնդրի վերաբերյալ հարցերը քննարկել «թուղթ ու մատիտով»:
Հանրային խորհրդի հասցեին հնչած քննադատությունների վերաբերյալ Վ. Մանուկյանը նշեց, որ Հանրային խորհուրդը տրանսպորտի հարցը բարձրացրել է այն ժամանակ, երբ Երևանի քաղաքապետ Կարեն Կարապետյանն էր, իսկ հուլիսի 19-ի` սակագնի բարձրացումից առաջ, խորհրդում «մեծ նիստ» է կայացել:
«Ցավոք սրտի, քաղաքապետարանն ուղղակի շտապեց, գնաց բարձրացման, դուք էլ ճիշտ արեցիք՝ պայքարեցիք, մենք էլ մեր կողմից էինք ազդում` և´ գրավոր, և´ բանավոր, և´ հանդիպումներով, որպեսզի այդ հարցը լուծվի»,- ասաց Վ. Մանուկյանը:
Վազգեն Մանուկյանը՝ լինելով «Ղարաբաղ» կոմիտեի ղեկավարներից մեկը, վկայակոչելով սեփական քաղաքական փորձը, երիտասարդ ակտիվիստներին կոչ արեց չխուսափել իշխանությունների հետ բանակցելուց, քանի որ, իր խոսքով, հակառակ ճամբարի հետ բանակցելը «չի նշանակում կեղտոտվել»:
Հին սերնդի ներկայացուցիչ Վազգեն Մանուկյանին հակադարձեց երիտասարդ ակտիվիստ Կարեն Հարությունյանը:
«Այստեղ խոսք գնաց ժողովրդավարական լինելուց, անցյալից: Եթե ժողովրդավարության մասին ենք խոսում, եկեք կերտենք ժողովրդավարություն, ոչ թե խոսենք, որ մենք արդեն ունենք ժողովրդավարություն»,- ասաց ակտիվիստը:
«Իհարկե, մի քիչ նախանձում եմ այս հեղափոխական ոգևորությանը, վաղուց չէի ապրել»,- պատասխան ելույթում ժպտալով ասաց Վազգեն Մանուկյանը:
«Այստեղ խոսք գնաց այն մասին, որ կան մարդիկ, ովքեր ծեծել են և այլն… Եթե կան այդպիսի մարդիկ, այդ մարդկանց հրաժարականը պահանջելը մեկից մեկ է, այդտեղ որևէ մեկը ձեզ հետ չի վիճում, բայց, գիտեք, ես 25 տարի ապրում եմ այս նույն տեղում: Բայց խնդիրն այլ է, այստեղ երիտասարդները հայտարարում են, որ միակ միջոցը իշխանափոխությունն է: Ժողովուրդ, գիտեք` ինչ, իշխանության մեջ լավն էլ է լինում, վատն էլ: Եթե մեր խնդիրը միայն իշխանություն փոխելն է, նշանակում է` արանքում ո´չ տրանսպորտի համար պետք է պայքարել, ո´չ որևէ այլ բանի համար, պիտի միայն պայքարել իշխանություն փոխելու համար»,- ասաց Վազգեն Մանուկյանը:
Ակտիվիստ Կարեն Հարությունյանն էլ պատասխանեց, թե նման պահանջ չի եղել շարժման կողմից:
