Հմայակ Հովհաննիսյան. «Ո՞վ չգիտի, որ տրանսպորտից օգտվում են հենց սոցիալապես անապահով խավերը»
Այսօր հրավիրված մամուլի ասուլիսում Հայաստանի քաղաքագետների միության նախագահ Հմայակ Հովհաննիսյանը և Գերագույն խորհրդի նախկին պատգամավոր Ազատ Արշակյանը համաձայնեցին այն մտքի հետ, որ հասարակական տրանսպորտի սակագնի բարձրացումից հետո առաջացած հասարակական դժգոհությունն ինքնաբուխ էր և միանգամայն հնարավոր էր Հայաստանի ներկայիս հասարակական-քաղաքական իրավիճակում:
«Այն, ինչ այսօր տեղի է ունենում Հայաստանում, հատուկ է կոմունիկացիոն դարում ապրող հասարակությանը»,- ասաց Հմայակ Հովհաննիսյանը` ավելացնելով, որ չի կիսում վարչապետ Տիգրան Սարգսյանի «լավատեսությունը», որ «Հայաստանում ձևավորվում է ուժեղ քաղաքացիական հասարակություն»:
Իսկ ո՞րն է հայաստանյան քաղաքական ուժերի դերը ստեղծված նոր իրավիճակում:
«Կարծում եմ` ոչ միայն ընդդիմությունը, այլև ընդհանրապես քաղաքական կուսակցությունների բյուրոկրատիան, չինովնիկները հետ են մնում հասարակական զարգացումներից, այսինքն` մարդիկ առաջ են գնացել իրենց պահանջներով, իրենց ինքնագնահատականներով: Հասարակությունն առաջ է գնացել, իսկ քաղաքական կուսակցությունների բյուրոկրատիան հետ է մնացել, նա չի հասցնում,- ասաց քաղաքական գործիչ Ազատ Արշակյանը,- Անձնավորությունները, քաղաքական կուսակցությունների ղեկավար անձնակազմը պե´տք է փոխվի ընտրությունների միջոցով: Հնացել են, մաշվել են»:
«Մենք չունենք քաղաքական էլիտա, մենք ունենք իշխանություն, դա էլիտա չէ, նրանց մի մասը, ում ես ճանաչում եմ, ընդհանրապես էլիտա չէ: Այո´, նրանք կարող են լինել քրեական էլիտա. բանտում կա էլիտա, ասում են` ամենավատ հանցագործն էլիտա է: Մեզ մոտ կան քաղաքական էլիտայի առաջին ծիլերը, և ենթադրում եմ, որ առաջիկայում` կլինի ոչ միայն քաղաքական, այլ ֆիզիկական սերնդափոխություն: «Հոմոսովետիկուս» քաղաքական գործիչները, Գորբաչովի կոմսոմոլները և այլն պետք է հեռանան քաղաքական ասպարեզից»,- ավելացրեց Ազատ Արշակյանը:
Իսկ քաղաքագետ Հմայակ Հովհաննիսյանը, շարունակելով Ազատ Արշակյանի միտքը, նշեց, որ կուսակցություններում չկա իշխանափոխության այլ մեխանիզմ, քան կուսակցության տրոհումը: «Եթե կուսակցության մեջ փոխվում է ղեկավարությունը, դա տեղի է ունենում տրոհման միջոցով, ինչպես, ասենք, տեղի ունեցավ ԱԺՄ-ում, չորս մասի բաժանվեց և այլն: Նորմալ ձևով իշխանափոխության մեխանիզմը չի գործում, ինչպե՞ս կարելի է պահանջել նորմալ ռոտացիայի մեխանիզմ պետությունում, եթե կուսակցությունների ներսում չկա իշխանափոխության մեխանիզմը»,- ասաց նա:
Ավելին, ըստ Հմայակ Հովհաննիսյանի, Հայաստանի գործող քաղաքական կուսակցություններն ընդհանրապես հետ են մնացել այն քաղաքական մշակույթից, որը վերջին տասնամյակում ամրագրվել է առաջատար ժողովրդավարական երկրներում:
Վերադառնալով տրանսպորտի խնդրին` Հմայակ Հովհաննիսյանն անդրադարձավ Երևանի քաղաքապետ Տարոն Մարգարյանի երեկվա հայտարարությանը, ըստ որի` քաղաքային իշխանությունները նախատեսում են հետագայում տրանսպորտի սակագինը դարձնել 150 դրամ, սակայն միաժամանակ արտոնություններ են տրամադրելու «սոցիալապես խոցելի խավերին»:
«Իհարկե, սա կոռուպցիայի մի տարբերակ է, նաև կաշառքի և մարդկանց, հասարակության տարբերակ է: Ո՞վ չգիտի, որ տրանսպորտից օգտվում են հենց սոցիալապես անապահով խավերը, կարո՞ղ է`են ետևը ջիպերը գցածներն են օգտվում»,- ասաց Հմայակ Հովհաննիսյանը:
Ի դեպ, կես-կատակ, կես-լուրջ արված այն դիտարկմանը, որ Հմայակ Հովհաննիսյանը նույնպես օգտվում է հասարակական տրանսպորտից, քաղաքագետը պատասխանեց համարժեք հումորով. «Չէ, իմ աշխատանքի վայրը տանը կպած է, այնպես որ, ես ոտքով եմ գնում»:
