Իսրայելը երբեք էլ չի դադարեցրել զենքի արտահանումը Թուրքիա. Haaretz
Իսրայելական Haaretz թերթի փոխանցմամբ՝ Իսրայելի պաշտպանության նախարարության Օտարերկրյա պաշտպանության աջակցության և արտահանման վարչության (SIBAT)պետ, բրիգադի գեներալ Սհեմայա Ավիելին հայտարարել է, որ զենքի շուկայի հարցում «զարգացող երկրների» կարգավիճակ ունեն Թուրքիան, Վիետնամը, Մալայզիան ու Ինդոնեզիան:
Նա հավելել է, որ Իսրայելը երբեք էլ չի դադարեցրել զենքի արտահանումը Թուրքիա՝ չնայած երկու երկրների միջև առաջացած քաղաքական («Ազատության տորմիղի») ճգնաժամին. «Թուրքիային զենքի մատակարարումը շարունակվել է Իսրայելի պետական շահերի պաշտպանությամբ:
Ճիշտ է՝ զենքի մատակարարումը չի շարունակվել նախորդ տարիների մակարդակով, սակայն եթե հայացք նետենք թվերին, ապա Թուրքիային զենքի արտահանումը երբեք զրո չի եղել:
Թուրքիային զենքի արտահանման մեծ մեծ մասը կազմում են նախկին պայմանագրերի շրջանակներում իրականացվող մատակարարումները, սակայն Թուրքիայից կան նոր առաջարկներ, որոնց ներկայումս մենք հետազոտում ենք»: Թուրքական մամուլն իսրայելցի զինվորականի այս հայտարարությունը որակել է որպես «շոկային»:
Նշվում է, որ զենքի արտահանման հարցում Իսրայելը տեղ է զբաղեցնում աշխարհի մասշտաբով առաջատար տասնյակում: Նախորդ տարի Իսրայելից զենքի արտահանման ծավալը կազմել է 7.4 միլիարդ դոլար, որի առյուծի բաժինը կազմել են լրտեսական ինքնաթիռները:
