Թուրքիան ստացել է ՇՀԿ-ի հետ երկխոսելու գործընկերոջ կարգավիճակ
Ռուսական РИА Новости լրատվական գործակալության փոխանցմամբ՝ Թուրքիան ստացել է Շանհայի համագործակցության կազմակերպության (ՇՀԿ) հետ երկխոսելու գործընկերոջ կարգավիճակ:
Համապատասխան հուշագիրն այսօր Ալմա Աթայում ստորագրել են ՇՀԿ գլխավոր քարտուղար Դմիտրի Մեզենցևն ու Թուրքիայի արտգործնախարար Ահմեթ Դավութօղլուն:
ՇՀԿ-ի ստեղծման մասին փաստաթուղթը ստորագրվել է 2001 թվականի հունիսի 15-ին՝ վեց երկրների ղեկավարների հանդիպման ժամանակ: ՇՀԿ-ի անդամ երկրներն են Ռուսաստանը, Չինաստանը, Ուզբեկստանը, Ղազախստանը, Տաջիկստանը, Ղրղզստանը:
ՇՀԿ-ում դիտորդ երկրի կարգավիճակ ունեն Հնդկաստանը, Իրանը, Մոնղոլիան, Պակիստանը: ՇՀԿ-ի հետ երկխոսության գծով գործընկերներն են Բելառուսը և Շրի Լանկան, որոնց միացավ նաև Թուրքիան:
Ադրբեջանական լրատվամիջոցները, մեկնաբանելով Թուրքիայի կողմից ՇՀԿ-ի հետ երկխոսելու գործընկերոջ կարգավիճակի ստանալը, գրել են, որ դա նշանակում է, թե Թուրքիան իր վերահսկողության տակ է առնում Կենտրոնական Ասիան:
