Թուրքիայի փոխվարչապետը քննադատել է ԱՄՆ պետքարտուղարին
Թուրքական Anadolu լրատվական գործակալության փոխանցմամբ՝ Թուրքիայի փոխվարչապետ Բյուլենթ Արընչն Անկարայում տեղի ունեցած կառավարության նիստից հետո անդրադարձել է վարչապետ Ռեջեփ Էրդողանին ԱՄՆ պետքարտուղար Ջոն Քերիի տված այն խորհրդին, որում կոչ էր արվում առայժմ զերծ մնալ Գազայի հատված այցելելուց.
«Հարգարժան Քերին Թուրքիա է այցելում երրորդ անգամ և անմիջականորեն ասել է, որ իրենք չեն ցանկանում, որ վարչապետը մայիսին մեկնի Գազա: Դա դիվանագիտական տեսանկյունից սխալ է, ճիշտ չէ:
Մեր հարգարժան վարչապետի կամ մի թուրք պաշտոնյայի այս կամ այն վայր մեկնելու մասին որոշումն ընդունում է մեր կառավարությունը: Անընդունելի է սրանից դուրս որևէ մեկից թույլտվություն ստանալն այդ հարցում:
Սա պետք է, որ լավ իմանա թե՛ պարոն Քերին, թե՛ ողջ աշխարհը: Վարչապետն ինչ ցանկանա, այն էլ կանի»:
Հիշեցնենք, որ Էրդողանը որոշել է Գազայի հատված այցելել մայիսի 16-ին ԱՄՆ կատարելիք այցից հետո:
