Սիրիայում գնալով բարելավվում է իրավիճակը. Բաշար Ասադ
Սիրիական SANA պետական լրատվական գործակալության փոխանցմամբ՝ Սիրիայի նախագահ Բաշար Ասադը Լիբանանից ժամանած պատվիրակության հետ զրույցում հայտարարել է, որ Սիրիայում գնալով բարելավվում է իրավիճակը՝ շնորհիվ ժողովրդի ու բանակի համախմբվածության:
Ասադն անհնար է համարել զինված խմբավորումների հետ հաշտվելու հնարավորությունը՝ ընդգծելով, որ Դամասկոսը շարունակում է դիմակայել ահաբեկչությանը:
Ասադի խոսքերով՝ ընդդիմադիր Սիրիական ազատ բանակը վերածվել է ահաբեկչական կազմակերպության. «Նա, որ հայտնի է եղել որպես «ազատ բանակ», այլևս գոյություն չունի: Ներկայումս մենք պայքարում ենք «Ալ Քաիդայի» դեմ: Այդ կազմակերպությունում ներառված են 23 երկրների զինյալներ, որոնք մարտնչում են մեր երկրում»:
Ասադն իր դժգոհությունն է հայտնել հակամարտության նկատմամբ Լիբանանի զուսպ դիրքորոշման կապակցությամբ. «Լիբանանը նման է մի մարդու, ով կանգնած է կրակի շուրջ: Գնալով այն առավել է մոտենում իրեն, և նա չի կարող զսպել իրեն:
Ես հիրավի չգիտեմ, թե ինչ է նշանակում նման քաղաքականությունը: Արդյոք դա նշանակո՞ւմ է, որ Լիբանանը պատրաստվում է հեռանալ Աֆրիկա, սպասել այնտեղ սիրիական ճգնաժամի ավարտին, իսկ հետո նոր հետ վերադառնալ»:
