Գրքի քանդակ՝ WiFi սարքավորումով (լուսանկարներ)
Այսօր Խնկո-Ապոր անվան ազգային մանկական գրադարանի դիմաց տեղի ունեցավ ոսկերիչ-դիզայներ Արմեն Դավթյանի (Նուռ) հեղինակած «Ընթերցողը» քանդակի բացման արարողությունը:
168.am-ի հետ զրույցում Ա. Դավթյանն ասաց, որ արձանի պատրաստման վրա աշխատել է մոտ մեկ տարի. «Այն իրենից ներկայացնում է գրքերի կույտ: Ներսում տեղադրված է WiFi սարքավորում, որը թույլ է տալիս այցելել ընդամենը մեկ կայք, այն է՝ karda.am: Մարդիկ այնտեղից կարող են ներբեռնել 1 մլն առաջարկված գրքերից ցանկացածը, տանել տուն և կարդալ, կամ էլ նստել տեղում և կարդալ»:
Նուռը մեզ հետ զրույցում նաև ասաց, որ արձան պատրաստելու և տեղադրելու առաջարկն ինքն է արել Երևանի քաղաքապետարանին, որն էլ «սիրով համաձայնել է տվյալ միտքն իրականացնելուն»:
Երևանի քաղաքապետի խորհրդական Արամ Սուքիասյանն էլ, իր հերթին, ասաց, որ այս արձանի խորհուրդն այն է, որ այսօր ամփոփվում է ՅՈՒՆԵՍԿՕ-ի կողմից հայտարարված «Երևանը՝ 2012թ. գրքի համաշխարհային մայրաքաղաք» ծրագիրը. «Երևանը որքան էլ որ այս տիտղոսը փոխանցի Բանգկոկին, միևնույն է, շարունակելու է մնալ գրքի մայրաքաղաք, որովհետև բազում նախաձեռնություններ կան, որոնք դեռ ընթացքի մեջ են: Վստահաբար պիտի ասենք, որ բազմաթիվ ծրագրեր իրենց լուրջ դերակատարումն ունեցան մեր հանրույթի մեջ, որովհետև «Երևանը՝ 2012թ. գրքի համաշխարհային մայրաքաղաք» լինելու բացմանը մենք ունեցանք արձանի բացում՝ Կորյուն փողոցի վրա, և փակմանը ևս ունենում ենք մնայում արժեք, որը տարիներ շարունակ մեզ կհիշեցնի, որ երբևէ՝ 2012 թվականին, հանդիսացել ենք Գրքի համաշխարհային մայրաքաղաք, և այս կամ այն կերպ՝ և՛ կպարտավորեցնի, և՛ անպայման հպարտություն կներշնչի»:
Քանդակի բացման արարողությանը նաև ներկա էր աշխարհահռչակ պոետ Ադոնիսը:
«Մենք կվախենայինք, որ համակարգիչը, համացանցը պետք է ջնջեն գրքի դերը և անհետ կորստի պիտի դատապարտեն: Բայց իրողությունն այն է, որ համացանցը եկավ ավելի հաստատելու գրքի և՛ դերակատարությունը, և՛ արժեքը: Գրքի կողքին հատուկ կարևորություն ունի ընթերցողը, որովհետև գիրքը իմաստավորվում է ընթերցողի ներկայությամբ»,- ասաց նա:
Լուսանկարները՝ Գոհար Արամյանի և ՖոտոԼուրի
