Գամելով Թրամփին վենեսուելական ուղղությամբ, նրանք այլ՝ ավելի կարևոր ուղղություններով կարող են ավելի սահմանափակել նրա հնարավորությունները. Հակոբ Բադալյան
Քաղաքական վերլուծաբան Հակոբ Բադալյանն իր թելեգրամյան ալիքում գրում է.
«ԱՄՆ նախագահ Դոնալդ Թրամպը բացասական է պատասխանել լրագրողների հարցին, թե մտադի՞ր է արդյոք ռազմմական հարված հասցնել Վենեսուելային: Միջազգային մամուլում վերջին օրերին այդ առնչությամբ լինում են տարբեր հրապարակումներ, ընդհուպ այն, որ Թրամպը ծրագրել է Վենեսուելայի նախագահ Մադուրոյին հեռացնել իշխանությունից ուժային գործողության միջոցով:
Վենեսուելային հարվածելու մտադրության մասին հարցին Թրամպը սակայն լրագրողներին պատասխանել է՝ «Ոչ»: Սա երաշխի՞ք, որ իքս պահի այն չի դառնա այո: Կարծում եմ՝ ոչ, երաշխիք չէ: Երաշխիք չէ ոչ այն պատճառով, որ Թրամպը կարող է փոշմանել: Նրան պարզապես կարող են պարտադրել մտնել Վենեսուելայի հետ ռազմական բախման մեջ: Պարտադրողներն իհարկե նրա քաղաքական հակառակորդներն են, կամ այսպես ասած՝ եվրաատլանտյան ուլտրագլոբալիստական թևը:
Գամելով Թրամպին վենեսուելական ուղղությամբ, նրանք այլ՝ ավելի կարևոր ուղղություններով կարող են ավելի սահմանափակել նրա հնարավորությունները, միևնույն ժամանակ նաև կոտրել «խաղաղարարի» իմիջը, որ Թրամպը փորձում է «քարից հաց քամելու» տրամաբանությամբ քամել իր համար: Կրկնեմ, հարցն այստեղ այն չէ, որ ուլտրագլոբալիստները չար են, իսկ Թրամպը՝ բարի, և չի ուզում պատերազմ: Այստեղ քաղաքական պարադիգմի հարց է:
Թրամպի նպատակների ծիրում առավել պահանջված միջավայր է կառավարելի, կայուն միջավայրը: Նրա եվրաատլանտյան հակառակորդների համար պատկերը և պարադիգմը հակառակն է. նրանց համար էական է Թրամպին ներքաշել հնարավորինս շատ ռազմական «կաթսաների» մեջ»:
