Պուտինը շնորհավորել է Նիկոլաս Մադուրոյին
Ռուսական ИТАР-ТАСС լրատվական գործակալության փոխանցմամբ՝ Ռուսաստանի նախագահ Վլադիմիր Պուտինը շնորհավորել է Նիկոլաս Մադուրոյին՝ Վենեսուելայի նախագահական ընտրություններում տարած հաղթանակի կապակցությամբ:
Այս մասին հայտնել է Կրեմլի մամուլի ծառայությունը: Վերջինիս հաղորդմամբ՝ իր շնորհավորական ուղերձում Պուտինը վստահություն է հայտնել, որ Նիկոլաս Մադուրոյի գլխավորությամբ Վենեսուելան հետագայում նույնպես կամրապնդի Ռուսաստանի հետ ռազմավարական գործընկերությունը:
Պուտինն ընդգծել է, որ Ռուսաստանը պատրաստ է Վենեսուելայի հետ երկկողմանի ու միջազգային հարցերի շուրջ կառուցողական երկխոսության հետագա զարգացմանը, ինչը համապատասխանում է երկու ժողովուրդների ու երկրների շահերին:
Հիշեցնենք, որ Նիկոլաս Մադուրոն ընդամենը 1.69 տոկոսով է առաջ անցել ընդդիմադիր թեկնածու Էնրիկե Կապրիլեսից, ով հրաժարվում է ճանաչել ընտրությունների արդյունքները:
