Թուրքիան ու Իսրայելը փոխհատուցման շուրջ կբանակցեն հաջորդ շաբաթ. Դավութօղլու
Թուրքական Haber Türk թերթի փոխանցմամբ`Թուրքիայի արտգործնախարար Ահմեթ Դավութօղլուն հայտարարել է, որ Թուրքիան ու Իսրայելը հաջորդ շաբաթ սկսելու են բանակցել «Մավի Մարմարայի» միջադեպի կապակցությամբ փոխհատուցման վճարի շուրջ:
Դավութօղլուն իր այս հայտարարությունն արել է Ստամբուլում, ուր ժամանել է Թուրք-արաբական տնտեսական ֆորումին մասնակցելու նպատակով: Լրագրողների հետ զրույցում Դավութօղլուն հայտարարել է.
«Մեր ներկայացրած երեք պահանջներից կատարվել է մեկը, սակայն փոխհատուցման հետ կապված հարցերը քննարկվելու են հաջորդ շաբաթ: Մենք մշտապես մեր ուշադրության կենտրոնում ենք պահում (Գազայի հատվածի) բեռնարգելքի վերացման հարցը»:
Իսրայելական պատվիրակությունը հաջորդ շաբաթ կժամանի Թուրքիա և կքննարկի 2010 թվականի մայիսի 31-ին գրանցված «Մավի Մարմարայի» միջադեպի հետևանքով զոհված Թուրքիայի 9 քաղաքացիների հարազատներին փոխհատուցում վճարելու հարցը:
