«Եթե Սերժ Սարգսյանը որոշել է երդվել, թող երդվի, բայց թույլ չենք տա, որ դա անի մեր անունից, մեր ընտանիքի անունից». Նիկոլ Փաշինյան
Ինչու օտարերկրյա պետությունների ղեկավարները շնորհավորեցին Սերժ Սարգսյանին
Ազատության հրապարակում այսօր ելույթ ունեցավ ԱԺ ՀԱԿ խմբակցության պատգամավոր Նիկոլ Փաշինյանը: Նա անդրադարձավ այն պետությունների նախագահներին, ովքեր «միանգամից շնորհավորեցին Սերժ Սարգսյանին՝ իբր Հայաստանի նախագահ ընտրվելու կապակցությամբ»:
Փաշինյանը նշեց, որ հարգանքով է վերաբերում թեմայի շուրջ արտահայտված կարծիքներին, բայց կարծում է, որ թեման ունի վճռորոշ հանգամանք: «Ֆրանսիայի, Ռուսաստանի Դաշնության, ԱՄՆ-ի նախագահները իրենց ծառայության բերումով պարտավոր են արձանագրել իրողություններ: Տվյալ դեպքում իրողության արձանագրումն այնն է, որ, ըստ ԿԸՀ-ի պաշտոնական արդյունքների, Սերժ Սարգսյանը վերընտրվել է նախագահ: Որևէ պետության ղեկավար չի կարող առաջնորդվել այն սկզբունքով, որ պետք է կասկածի պետությունների ԿՀԸ-ների արդյունքները: Հակառակ դեպքում՝ միջազգային քաոս կստեղծվի, խառնաշփոթ»,- պարզաբանեց նա:
Նիկոլ Փաշինյանը նշեց, որ այս ֆոնին բնական հարց է առաջանում՝ միթե՞ հնարավոր չէ չեզոքացնել այս իրողությունը: Իսկ պատգամավորի համար հարցի պատասխանը միանշանակ է. «Հնարավոր է և ԿԸՀ տխրահռչակ արձանագություն սահմանացած իրողությունը պետք է չեզոքացնել՝ քաղաքական, քաղացիական պայքարի միջոցով»: Ըստ նրա՝ հզորագույն քայլը, որը կարող է բեկել վերոգրյալ իրողությունը, ապրիլի 9-նի հանրահավաքն է: «Պատկերացրեք մի տեսարան, որ Սերժ Սարգսյանը Մարզահամերգային համալիրում նեղ շրջանակի առաջ երդում է տալիս, իսկ ՀՀ քաղաքացիները հավաքվում են Ազատության հրապարակում՝ ի նշանավորում այն բանի, որ Սերժ Սարգսյանին չեն ընտրել որպես ՀՀ նախագահ ու չեն ճանաչում նրա իշխանությունը»,- մասնավորեցրեց նա:
Նիկոլ Փաշինյանը շեշտեց, որ իր համար առանցքային չի եղել հանրահավաքի մասնակիցների թիվը, բայց նշեց, որ ապրիլի 9-ի հանրահավաքը բացառիկ դեպք է ու այդ թիվը կարևոր է, որովհետև, նրա խոսքով, դա սովորական հանրահավաք չէ, այլ՝ ուրիշ քաղաքական իրողության ձևավորում, որը ծանրակշիռ քաղաքական իրադարձություն դառնալով՝ պետք է դառնա հաշվի նստելու առիթ:
«Այդ օրը պետք է հաշվարկվի յոթ, ութ ինը հարյուր հազարավոր հանրահավաք: Դա պետք է լինի ոչ թե հանրահավաք, այլ քաղաքացիական օվկիանոս: Չեմ ուզում խոսել, թե ինչ կանխատեսում ունեմ ապրիլի 9-ին. ես ունեմ ընտանեկան որոշում՝ ապրիլի 9-ին ժամը 11:00-ին առանց մեկ րոպե ուշացման, ընտանիքիս ու մանկահասակ երեխաներիս հետ լինելու եմ Ազատության հրապարակում: Այդ օրը իմ երեխաները դասի չեն գնալու, մենք գործի չենք գնալու: Եթե Սերժ Սարգսյանը որոշել է երդվել, թող երդվի, բայց թույլ չենք տա, որ դա անի մեր անունից, մեր ընտանիքի անունից»,- հայտարարեց նա՝ ավելացնելով, թե ինքը իր ընտանիքի հետ գալու է Ազատության հրապարակ` իր «ընտանքի անունը տարանջատելու համալիրում տեղի ունեցող պետական սրբապղծությունից ու հայտարարելու Հայաստանը չի ունեցել, չունի ու չի ունենալու Սերժ Սարգսյան անունով նախագահ»:
