Հարավային Կորեան պաշտոնական բողոք է հայտնել Ճապոնիային
Հարավկորեական Renhap լրատվական գործակալության փոխանցմամբ՝ Հարավային Կորեան պաշտոնական բողոք է հայտնել Ճապոնիային, որն իր արտաքին քաղաքականության նոր հայեցակարգում հաստատել է իր հավակնությունները Տակեսիմա (հարավկորեական անունը՝ Տոկտո) կղզու նկատմամբ, որը հանդիսանում է երկու երկրների միջև տարածքային վեճի առարկա:
Պաշտոնական բողոքի նոտա հղելու պատճառն ամեն տարի «Ճապոնիայի արտաքին քաղաքականության վերաբերյալ կապույտ գրքի» հրատարակումն է, որում այդ կղզին ներառվել է ճապոնական տարածքի կազմում:
Այս կապակցությամբ Հարավային Կորեայի ԱԳՆ-ի ներկայացուցիչ Չո Տե Յոնը հայտարարել է, որ իր երկրի կառավարությունը կոշտ բողոք է հայտնում Ճապոնիայի կառավարության կողմից դիվանագիտական «Կապույտ գրքի» հավանության արժանացման դեմ, որը պարունակում է անարդարացի հավակնություններ Տոկտո (Տակեսիմա) կղզու հանդեպ:
Երկրորդ համաշխարհային պատերազմի ավարտից հետո Տոկիոն հավակնում է Ճապոնական ծովի արևմտյան հատվածում գտնվող մի շարք փոքր կղզիների, որոնք գտնվում են Հարավային Կորեայի ինքնիշխանության ներքո: Այդ կղզիները հայտնի են նաև Լիանկուր անվամբ:
