Ժառանգական հիվանդությունների բուժման գինը Հայաստանում մինչև 100 հազար դոլարի է հասնում
Մանկական մահացությունը Հայաստանում նվազեցնելու համար պետք է հայտնաբերել հազվադեպ հիվանդություններն ու բուժել դրանք: Այս մասին լրագրողների հետ հանդիպման ժամանակ ասաց Հանրապետական գենետիկայի կենտրոնի ղեկավար Ալբերտ Մաթևոսյանը: Ըստ նրա՝ հազվադեպ հիվանդությունները լինում են տարբեր բնույթի՝ նյարդային, մկանային, նյութափոխանակության համակարգի. և այդ հիվանդությունների 80 տոկոսը ժառանգական են: Ալբերտ Մաթևոսյանը նշեց, որ Հայաստանում չկա հազվադեպ հիվանդությունների վիճակագրություն:
«Պետք է ունենալ ազգային տվյալների բազա, որ կարողանանք իմանալ՝ ինչ հիվանդություններ ունենք, որ ուղղությամբ պետք է զարգացնել մեր հիմնական բժշկական ծառայությունները»,- ասաց Ալբերտ Մաթևոսյանը: Վերջինս օրինակ բերեց ֆենիլկետոնուրիա հիվանդությունը. մինչև 18 տարեկան 60 հիվանդ է բուժում ստանում գենետիկայի կենտրոնում: Ըստ Ա. Մաթևոսյանի`այդ ընթացքում նրանք բուժում ստանում են պետպատվերի շրջանակներում, սակայն 18 տարին լրանալուց հետո նրանք ինքնուրույն պետք է ապահովեն իրենց բուժումը:
«Ժառանգական հիվանդությունների բուժումը միայն պետական առողջապահության հարց չի. այդ բուժումը և օգնությունը շատ թանկ է. մի հիվանդի բուժումը մի տարվա ընթացքում մոտավորապես կարող է մի քանի հազարից մինչև հարյուր հազար դոլարների հասնել: Որոշ դեղեր կան, որ հարյուր հազար դոլարներ արժեն»,- ասաց Ա. Մաթևոսյանը: Հարցին՝ ինչպես է գնահատում մասնագետների պատրաստվածության աստիճանը, վերջինս պատասխանեց. «Հազվադեպ հիվանդությունների մակարդակով մենք ունենք մեծ անելիքներ: Դժբախտաբար, գիտելիքների որոշ պրոբլեմներ ունենք»:
