Հեռախոսային էթիկետ. ինչպե՞ս օգտվել բջջային հեռախոսից
«Samsung Electronics Baltics»-ի հաղորդակցության մասնագետները բջջային հեռախոսից օգտվելու կանոններ են առաջարկում, որոնք, ըստ նրանց, շատ բնական են եւ ջանքեր չեն պահանջում, հատկապես որ ժամանակակից բջջային հեռախոսները մեծ հնարավորություններ ունեն:
Այսպիսով, ինչպե՞ս խոսել հեռախոսով զրուցակցի հետ եւ հանրային վայրերում.
Քաղաքավարի խոսք
Այս կանոնը գործում է ցանկացած իրավիճակում. կարեւոր է խոսել գրագետ` օգտագործելով կոռեկտ բառապաշար:
Հարգեք զրուցակցի ժամանակը
Եթե զրույցի ընթացքում պարզվում է, որ հարկավոր է շտապ գործերով զբաղվել, զրուցակցին երկար սպասեցնել մի տվեք:
Լիակատար ուշադրություն
Ուշադրությունը նաեւ հարգանքի նշան է, ուստի զրույցի ժամանակ կողմնակի գործերով խորհուրդ չի տրվում զբաղվել:
Հարգանք` դիմացինի նկատմամբ
Խուսափեք խանութի վաճառասեղանի մոտ, բանկում, ռեստորանում հեռախոսով խոսելուց, երբ ձեզ սպասարկում են:
Հաշվի առնել իրավիճակը
Խուսափեք տրանսպորտում կամ վերելակում հեռախոսով անձնական հարցեր քննարկելուց: Մի կողմից` խախտում եք ուրիշների անդորրը, մյուս կողմից` ձեր անձնական կյանքը դարձնում եք հանրային քննարկման առարկա:
Անվտանգություն` ճանապարհին
Թե վարորդներին, թե հեծանվորդներին եւ թե հետիոտներին խորհուրդ չի տրվում ճանապարհին օգտվել հեռախոսից:
Անջատեք հեռախոսը
Առօրյա կյանքում լինում են իրավիճակներ, երբ հեռախոսը պետք է անջատել, քանի որ անձայն ռեժիմը, վիբրացիան կարող են տեղին չլինել կարեւոր հանդիպումների ժամանակ:
Լռություն` ճաշի ժամանակ
Եթե դուք մենակ եք ճաշում եւ օգտվում եք հեռախոսից` դա թույլատրելի է, եթե միայնակ չեք, դա կարող է անքաղաքավարի թվալ:
Հեռախոսը` որպես այցեքարտ
Մինչ երաժշտություն կամ ֆոնային նկար ընտրելը` մտածեք, արդյոք դրանք տեղին կլինեն բոլոր իրավիճակներում:
