«Ես միայն գոհ կլինեմ, որ ինչ-որ ձևակերպմամբ ՀԽ-ի անդամներն օր առաջ ազատ արձակվեն». Արմեն Ռուստամյան

Հարցազրույց ՀՅԴ Բյուրոյի քաղաքական ներկայացուցիչ, ԱԺ ՀՅԴ խմբակցության ղեկավար Արմեն Ռուստամյանի հետ

– Պարոն Ռուստամյան, կրկին լուրեր են շրջանառվում, որ առաջիկայում Դաշնակցությանը պաշտոն է տրվելու, մասնավորապես, այս անգամ արդարադատության նախարարի աթոռի մասին է խոսք գնում: Ինչպե՞ս կմեկնաբանեք:

– Շրջանառվող լուրերը ես լրագրողներից եմ իմանում: Որտե՞ղ են շրջանառվում այդ լուրերը:

– Բանակցություններ, քննարկում, առաջարկ չի՞ եղել:

– Բացարձակապես, այդպիսի երևույթ գոյություն չունի: Բայց այդ լուրերը չեն դադարում շրջանառվել, անընդհատ գոյություն ունեն: Թե որտեղի՞ց են այդ լուրերը, հայտնի չէ:

– Կառավարությունում փոփոխություններ են սպասվում, նաև սպասվում է, որ ՀՅԴ-ն անպայման որևէ ձևով կմասնակցի կառավարության ձևավորմանը:

– Ես առիթ ունեցել եմ պատասխանել, թերևս, իմ կարծիքով, մոտիվացիա եմ գտնում այս չդադարող հարցերին, որ մեր բարձրացրած պրոբլեմների ուղղությամբ իսկապես երևում են տեղաշարժեր: Դրանք հայտնի 7 կետերի մեջ են ամփոփված: Եվ երևի դա առաջացնում է տպավորություն, որ այլևս ոչինչ չի խանգարում մեզ, որ մենք ավելի սերտ համագործակցության մեջ լինենք իշխանության հետ: Բայց դա մակերեսային տպավորություն է, որովհետև իսկապես մեր մոտեցումը մնում է անփոփոխ՝ մենք մինչև լիարժեք չհամոզվենք, որ այդ ուղղությամբ երկրում տեղի կունենան գործընթացներ` ի կատարումն 7 կետերի, մենք ինքնանպատակ երբեք չենք մտնի կոալիցիա:

– Խոսքը տվյալ դեպքում կոալիցիայի մասին չէ:

– Բա պաշտոններն ինչպե՞ս են տալիս:

– Օրինակ` Արա Նռանյանը ԵՏՄ շրջանակներում պաշտոն ստացավ, կամ Վահան Հովհաննիսյանը դեսպան նշանակվեց` առանց կոալիցիային մաս կազմելու:

– Այդ մոտեցումն ինձ համար հասկանալի չէ, որովհետև, եթե ՀՅԴ-ն իշխանության մեջ չի, ուրեմն որևէ դաշնակցական այս երկրում պետք է պաշտոն չունենա՞, կամ որևէ տեղ չմտնի՞ աշխատանքի: Դա նորմալ չի:

– Այսինքն` եթե նախարարի պորտֆելի առաջարկ լինի, Դաշնակցությունը կհրաժարվի՞:

– Դա կնշանակի` կոալիցիա: Նախարարը կառավարության անդամ է: Ամեն դեպքում, մինչև վերջերս այդպես էր:

– Պարոն Ռուստամյան, խոսք է գնում համաներման մասին, ենթադրվում է, որ մայիսի 5-ին ԱԺ արտահերթ նիստում կառավարությունն այդ հարցը կներառի ԱԺ օրակարգում: Ի՞նչ եք կարծում, ժամանա՞կն է համաներման համար:

– Համաներումները միշտ հումանիտար նպատակներով են կատարվում, և դա պարբերաբար կատարվող երևույթ է, և մենք միշտ դա ողջունում ենք, որովհետև միշտ պետք է մարդկանց հնարավորություն տրվի ներման միջոցով վերադաստիարակվելու: Եվ, բնականաբար, համաներումն այնպիսի մի մեխանիզմ է, որ ամբողջ աշխարհում գործում է: Եվ դա, իհարկե, կապվում է որոշակի իրադարձությունների, հոբելյանների հետ: Տվյալ պարագայում Ցեղասպանության 100-ամյա տարելիցն էր, և սա, այո՛, լավ առիթ է, որպեսզի համաներում լինի: Եվ կարծում եմ` վերջին համաներումը, բավականին երկար ժամանակ է, որ տեղի է ունեցել:

– Եթե հայտարարվի համաներում, այնուամենայնիվ, դա կտարածվի՞ Ժիրայր Սէֆիլյանի և իր ընկերների վրա: Չէ՞ որ դեռ դատավճիռ չկա:

– Համաներումը տարածվում է և՛ դատավճռի առկայության, և՛ քննության ընթացքում գտնվող գործերի վրա: Այնպես որ, դա դրա հետ կապված չէ: Համաներումն ունի մի քանի մակարդակ:

– Այդ դեպքում այս սպասվող համաներումը լավ առի՞թ է, որպեսզի Սէֆիլյանին և իր ընկերներին ազատ արձակեն` նկատի ունենալով նաև, որ ապրիլի 24-ն անցել է: Ի դեպ, շատերը Ձեր կանխատեսմանն են սպասում` հաշվի առնելով նախկին փորձը:

– Այն, ինչ ես ասում եմ, ելնում եմ պարզ տրամաբանությունից, որ գոյություն ունի: Ես ժամանակին ասել էի, որ հիմնական խնդիրը վերաբերում է նրան, որ անպայման ամսի 24-ին ինչ-որ միջոցառումներ էին ուզում նախաձեռնել: Եվ վտանգը, ըստ էության, որ կարող էր առաջանալ իրավական առումով, այդ հարցի հետ էր կապված:

Այո՛, երբ 24-ն անցավ, ես ասում էի, որ չի բացառվում, որ նաև դա նկատի ունենալով, որ իրավիճակը փոխվել է, այլևս իրենց հայտարարությունները, գործողությունները հասարակության նկատմամբ որևէ վտանգ չեն պարունակում, կարող է իրադրության փոփոխության հետ կապված փոփոխություն լինել, որ նախատեսում է մեր օրենսդրությունը: Ես ինքս հակված եմ, որ ավելի արդար է, երբ ավելի մեղմ են վերաբերվում, ըմբռնումով են մոտենում դատապարտվածներին և քննության մեջ գտնվողներին: Բայց կարծում եմ, որ սա պետք է բոլորիս համար հետևություններ անելու առիթ հանդիսանա: Այո՛, ես միայն գոհ կլինեմ, որ ինչ-որ ձևակերպումով օր առաջ ազատ արձակվեն: Ի վերջո, մարդիկ ընտանիքներ ունեն, և անազատությունը լավ բան չէ: