ԱՊՀ ՄԽՎ-ում պատվիրակությունների ղեկավարները հանդես են եկել համատեղ ասուլիսով

Սանկտ Պետերբուրգի Տավրիկյան պալատում ապրիլի 17-ին տեղի ունեցած ԱՊՀ մասնակից պետությունների ՄԽՎ հանդիսավոր լիագումար նիստի ավարտից հետո, որը նվիրված է եղել Հայրենական մեծ պատերազմում տարած հաղթանակի 70-ամյակին, ԱՊՀ մասնակից պետությունների ՄԽՎ-ում պատվիրակությունների ղեկավարները հանդես են եկել համատեղ մամլո ասուլիսով: Հայաստանի Հանրապետությունը ներկայացրել է ՀՀ ԱԺ փոխնախագահ Էդուարդ Շարմազանովը:

Լրագրողներից մեկը հետաքրքրվել է, թե ԱԺ փոխնախագահն ինչպես է գնահատում Հայաստանի անդամակցությունը Եվրասիական տնտեսական միությանը (ԵՏՄ): «ԵՏՄ-ին անդամակցելիս Հայաստանն առաջնորդվել է պետական շահով: Ժամանակը ցույց տվեց, որ ՀՀ Նախագահի որոշումն արդարացված էր, եւ պատահական չէր, որ Հայաստանի խորհրդարանական ուժերի ճնշող մեծամասնությունը կողմ քվեարկեց Հայաստանի անդամակցությանը ԵՏՄ-ին:

Միությանն անդամակցելով` Հայաստանի Հանրապետությունը դարձավ շուրջ 170 միլիոնանոց շուկայի մի մասը: Կցանկանայի կարեւորել նաեւ էժան էներգակիրների հասանելիությունը, ինչը Հայաստանի համար հեռանկարային նշանակություն ունի: Հայաստանի Հանրապետությունը սահմանին գազը ստանում է 189 ԱՄՆ դոլարով, իսկ նավթամթերքը ներկրում է 30 տոկոս ազատված մաքսատուրքով»,-ի պատասխան նշել է Էդուարդ Շարմազանովը:

ՀՀ ԱԺ