ՕԵԿ-ն ընդդիմություն է, բայց համաձայն է իշխանության հետ

Հարցազրույց ԱԺ ՕԵԿ խմբակցության անդամ Հովհաննես Մարգարյանի հետ

– Այսօր քննարկվում էր 2013թ. բյուջեի կատարողականի հաշվետվությունը, և այդպես էլ պարզ չդարձավ` ՕԵԿ խմբակցությունը կո՞ղմ, թե՞ դեմ է քվեարկելու:

– Նախ հաշվետվության մեջ հստակ ֆիքսված է, թե որքան է եղել 2013թ. բյուջեն, որքան են եղել եկամուտները, որքան` ծախսերը. միջինը 97-98 տոկոսով բյուջեն կատարվել է: Մեր կողմից, նաև իմ կողմից հնչեցվեցին հարցեր, տրվեցին պատասխաններ, իսկ թե ինչպիսին կլինի մեր դիրքորոշումը, մենք դա կորոշենք խմբակցության նիստում, քանի որ բյուջեի կատարողականի քննարկումը միայն այսօր ավարտվեց:

– Բոլոր մյուս խմբակցություններն արտահայտել են իրենց դիրքորոշումը, արդյո՞ք ձեր կողմից մինչև այժմ որոշում չկայացնելու պատճառն այն է, որ 2013թ. ՕԵԿ-ը կառավարության կազմում էր, և ինքն էլ մասնակցել է այդ բյուջեի ձևավորմանը և ծախսմանը, իսկ այժմ դուք ընդդիմություն եք:

– ՕԵԿ-ի համար երբեք դժվար չի եղել կողմնորոշվել, որովհետև մենք միշտ շիտակ և ազնիվ ենք եղել մեր դիրքորոշումների մեջ, անկախ նրանից` եղել ենք իշխանությո՞ւն, թե՞ ընդդիմություն: Մենք մեր դիրքորոշումն արտահայտել ենք ազատ և թափանցիկ, և հիմա էլ նույն ձևով, երբ որոշում կկայացնենք, կարտահայտենք այն:

– Քառյակը հրապարակեց 12 կետից բաղկացած իր հայտարարություն-պահանջագիրը, ինչպե՞ս եք վերաբերվում այդ պահանջներին, և արդյո՞ք այդ պահանջները կարող են էականորեն բարելավել տնտեսական իրավիճակը:

– Ընդհանուր առմամբ ես դրական եմ վերաբերվում այդ կետերին և ուզում եմ հիշեցնել, որ այդ կետերից որոշ մասի իրականացման համար մեր կուսակցության կողմից խորհրդարանում շրջանառության մեջ են դրվել մի շարք օրենսդրական նախաձեռնություններ: Օրինակ, քառյակի պահանջների մեջ կա կետ ճանապարհային երթևեկության կանոնների խախտման համար սահմանված տուգանքների չափը նվազեցնելու, արագաչափերի, կարմիր գծերի հետ կապված փոփոխություններ կատարելու մասով, մենք էլ ունենք Վարչական իրավախախտումների վերաբերյալ օրենսգրքում փոփոխություններ կատարելու առաջարկներ, կամ ունենք «Կուտակային կենսաթոշակների մասին» օրենքում փոփոխություն կատարելու առաջարկ, որով առաջարկում ենք պարտադիր բաղադրիչը հանել գործող օրենքից, կամ գյուղատնտեսությունը սուբսիդավորելու մասով մենք առաջարկում ենք ստեղծել Գյուղատնտեսության աջակցության ազգային հիմնադրամ, որպեսզի օգնենք գյուղացուն, որ նախ` իրեն կարողանա կերակրել, հետո` նաև ամբողջ հասարակությանը, ունենք առաջարկ` փոփոխություն կատարելու «Ընտրական օրենսգրքում», և այդ նպատակով քաղաքական կոնսուլտացիաներ ենք սկսել և խորհրդարանական, և ոչ խորհրդարանական ուժերի հետ:

Այդ նպատակով մենք առաջարկում ենք ստեղծել աշխատանքային խումբ, որտեղ կընդգրկվեն բոլոր շահագրգիռ ուժերը, և այդ խմբի կողմից կմշակվի «Ընտրական օրենսգրքի» փոփոխությունների նախագիծ, որտեղ առաջնայինը կլինի անցումը 100 տոկոս համամասնական ընտրակարգի, ինչպես նաև կլինեն դրույթներ, որոնք լրջորեն կխոչընդոտեն ընտրությունների կեղծմանը:

– Դուք նշեցիք մի քանի կետեր, որտեղ ՕԵԿ-ի և քառյակի մոտեցումները համընկնում են, այդ դեպքում ինչո՞ւ ՕԵԿ-ը ևս չի միանում քառյակի նիստերին. դուք իրենց առաջարկ չե՞ք արել, թե՞ սպասում եք, որ իրենք ձեզ նման առաջարկ անեն:

– Որտեղ որ մի լավ առաջարկ կա, որը մեր ժողովրդին օգուտ կբերի, ես ձեզ վստահեցնում եմ, որ ՕԵԿ-ը կաջակցի և կզորակցի դրան: Մենք միշտ համագործակցել ենք քաղաքական ուժերի հետ և հիմա էլ համագործակցում ենք: Եղել են դեպքեր, երբ քառյակի ներկայացուցիչները դիմել են մեզ, որ մենք պաշտպանենք իրենց դիրքորոշումը, և մենք աջակցել ենք, և մենք էլ ենք առաջարկել իրենց` աջակցել մեր օրենսդրական նախաձեռնություններին: Ուզում եմ ասել, որ մենք ունենք մեր օրակարգը, իրենք` իրենց, և երբ մենք ունենում ենք ընդհանրություններ, միշտ պատրաստ ենք համագործակցել:

– Արդյո՞ք ՕԵԿ-ի քառյակ չմտնելու պատճառն այն է, որ քառյակի լիդերը ԲՀԿ-ն է, իսկ այդ կուսակցության նախագահ Գագիկ Ծառուկյանի և ՕԵԿ նախագահ Արթուր Բաղդասարյանի հարաբերություններում լարվածություն կա:

– Գագիկ Ծառուկյանի և Արթուր Բաղդասարյանի միջև միշտ եղել են շատ նորմալ և գործընկերային հարաբերություններ, և դրանք այսօր էլ շարունակվում են, և ես համաձայն չեմ այդ տեսակետի հետ, որ մեր մեջ կա մրցակցություն կամ հակադրություն:

– Քառյակի կողմից առաջարկ եղե՞լ է մասնակցել համատեղ նիստերին, կամ դուք նման առաջարկ արե՞լ եք քառյակին:

– Օրինակ, ես հիշում եմ, որ քառյակի ներկայացուցիչները դիմեցին մեզ, որ մենք հետ կանչենք ԱԺ հաշվիչ հանձնաժողովի մեր անդամին, քանի որ քառյակն այնտեղ ներկայացուցիչ չուներ, իսկ մենք ունեինք, և մենք Իշխան Խաչատրյանին հետ կանչեցինք: Կամ կառավարության ծրագրի քվեարկության ժամանակ եղավ առաջարկ` չմասնակցել քվեարկությանը, և մենք չմասնակցեցինք:

– Իսկ եղե՞լ է առաջարկ մասնակցել իշխանությանն ուղղված հայտարարություն-պահանջագիրը կազմելուն:

– Ես ասացի, որ մենք բազմաթիվ օրենսդրական նախաձեռնություններ ունենք, որոնք պարունակում է նաև քառյակի հայտարարությունը: Այդ նպատակների իրականացման համար մենք կգտնենք համագործակցության ձևեր:

– Հենց այդ պատճառով, ավելի տրամաբանական չե՞ք համարում, որ համագործակցությունը կարող էր բացառել նման կրկնությունները, եթե դուք միասնական հանդես գայիք:

– Այն համագործակցությունը, որ կա տարբեր հարցերի շուրջ, իմ պատկերացմամբ` բերելու է նրան, որ այդ համագործակցության ընթացքն է հուշելու հետագա զարգացումները: Այսօր ամեն ինչ ընթանում է փոխադարձ ըմբռնման մթնոլորտում, և ես մեր միջև որևէ խնդիր չեմ տեսնում:

– Գուցե դուք մտավախություն ունեք, որ մտնելով քառյակ, դուք կկորցնե՞ք ձեր ինքնուրույնությունը:

– Ես չեմ կարծում, որ քառյակի մյուս անդամները կորցրել են իրենց ինքնուրույնությունը: Ես ընդամենն ուզում եմ ասել, որ ՕԵԿ-ը եղել է ինքնուրույն և կենսագրություն ունեցող քաղաքական ուժ և որևէ կաշկանդվածություն չի ունեցել և չի ունենա իր դիրքորոշումը արտահայտելու հարցում:

– Գրեթե 7 տարի իշխանությունում լինելուց հետո, դուք, արդեն երկու ամիս է, ընդդիմություն եք, հարմարվե՞լ եք ընդդիմության կարգավիճակին, թե՞ նոստալգիա եք ապրում իշխանության նկատմամբ:

– Աշխատող մարդու, քաղաքական ուժի համար տարբերություն չկա` իշխանությո՞ւն է, թե՞ ընդդիմություն: Աշխատանքը միշտ էլ դժվար է, և քաղաքական իրավիճակն է թելադրում այս կամ այն քաղաքական ուժին, թե որտեղ լինի`իշխանությունո՞ւմ, թե՞ ընդդիմությունում: Մենք այնտեղ ենք, որտեղ ավելի հեշտ կլինի իրականացնել մեր ծրագրերը:

– ՕԵԿ-ը հայտարարել է ընդդիմություն դառնալու մասին. արդյո՞ք ձեզ բավարարում է իշխանության կողմից իրականացվող արտաքին քաղաքականությունը, մասնավորապես` Եվրասիական տնտեսական միությանն անդամակցելուն ուղղված քայլերը, թե՞ դուք այլ մոտեցումներ ունեք:

– Մենք մեր դիրքորոշումը չենք փոխել, և երբ դեռ անցյալ տարի սեպտեմբերին քննարկվում էր Մաքսային միությանը միանալու հարցը, մենք արտահայտեցինք մեր դրական դիրքորոշումը: Մենք ասել ենք, որ Ռուսաստանը մեզ համար ռազմավարական գործընկեր է, և անվտանգության ընդհանուր համակարգի առումով կան ապագային միտված ծրագրեր: Իհարկե, մենք միշտ ասել ենք, որ պետք է բալանսավորված արտաքին քաղաքականություն վարենք մեր մյուս բոլոր գործընկեր երկրների հետ:

– ՕԵԿ-ը Եվրոպայի ժողովրդական կուսակցության անդամ է. որքանո՞վ եք նորմալ համարում, որ այդ կուսակցությանն անդամակցող կուսակցությունը հանդես է գալիս հօգուտ եվրասիական, և ոչ թե` եվրոպական ինտեգրման։

– Իսկ ի՞նչ է Եվրոպայի ժողովրդական կուսակցության անդամ մյուս կուսակցությունների համար ՕԵԿ դիրքորոշումը, հայտնի չէ, նրանք չգիտե՞ն, որ մենք կողմ ենք Հայաստանի եվրասիական ինտեգրմանը, իհա՛րկե գիտեն, որովհետև մենք մեր դիրքորոշումը միշտ բաց ենք արտահայտել: Եվ դա մի նոր հնարավորություն է` ավելի խորացնելու մեր համագործակցությունը մեր եվրոպացի գործընկերների հետ, վարելու բալանսավորված և բազմակողմանի արտաքին քաղաքականություն:

– Խոսքն առաջին հերթին` կուսակցության դավանած արժեքների և գաղափարախոսության մասին է, որի ընդհանրությունն է ձեզ տարել դեպի Եվրոպայի ժողովրդական կուսակցություն: Արդյո՞ք այդ արժեքները չեն ոտնահարվի, եթե Հայաստանն անդամակցի Եվրասիական միությանը:

– Մենք դեմ չենք եվրոպական լավագույն փորձը վերցնելուն. օրինակ` ճանապարհային երթևեկության կանոնների հետ կապված, կամ իրավական ոլորտում Եվրոպայի կուտակած փորձը մենք անպայման պետք է վերցնենք, որովհետև պետք չէ հեծանիվ հորինել: Բայց մենք ունենք անվտանգության խնդիրներ և մենք այդ անվտանգությունը կապում ենք մեր ռազմավարական գործընկեր Ռուսաստանի հետ: Եվ դրա մասին ևս պետք է շիտակ ասել:

– Մեր ռազմավարական գործընկերը ոչ մի ձևով չարձագանքեց, երբ Ղազախստանի նախագահն ընթերցում էր Իլհամ Ալիևի նամակը և պաշտպանում Ադրբեջանի շահերը: Չե՞ք կարծում, որ մեր դաշնակիցն այնքան էլ հուսալի չէ:

– Ես նորից եմ ասում. այո, մենք պետք է բալանսավորված քաղաքականություն վարենք և մեր որոշումների մեջ միշտ պետք է իրատես լինենք: Օրինակ` մենք չունենք ելք դեպի ծով, չունենք նավթի և գազի պաշարներ, մենք մեր քաղաքականությունը կառուցելիս պետք է ելնենք այս իրողություններից: Պետք է ելնենք այն իրողությունից, որ յուրաքանչյուր ժողովրդի համար տնտեսական հարցեր քննարկելիս չի կարող չքննարկվել անվտանգություն հարցը:

Իսկ մեր անվտանգության երաշխիքը մեր ռազմավարական գործընկերոջ հետ անցած ճանապարհն է, և պետք է հիշենք, որ մենք ունենք մեր սահմանները համատեղ պաշտպանելու համաձայնագրեր: Բայց նորից եմ կրկնում, չմեկուսանալով եվրոպական կառույցներից և եվրոպական գործընկեր երկրներից: