Ուզբեկստանում մասշտաբային համաներում է հայտարարվել
12uz.com կայքի փոխանցմամբ՝ Ուզբեկստանում հայտարարել են մասշտաբային համաներում՝ կապված Սահմանադրության ընդունման 21-ամյակի հետ: Համապատասխան որոշումն ընդունել է Ուզբեկստանի սենատը (խորհրդարանի վերին պալատ):
Ավելի վաղ հաղորդվել էր, որ պլանավորված է համաներել ավելի քան 90.000 մարդու: Համաներմամբ պատժից ազատվելու են կանայք, հանցագործության ժամանակ իրենց 18 տարին չբոլորածները, 60 տարեկանից բարձր տարիք ունեցող տղամարդիկ և օտարազգիները:
Համաներումը տարածվելու է նաև այլ կատեգորիայի մարդկանց վրա, ինչպիսին են ասենք արգելված կազմակերպությունների անդամ հանդիսանալու համար առաջին անգամ դատապարտվածները, որոնք ամուր բռնել են վերականգնման ուղին: Համաներումը չի առնչվելու հատուկ վտանգ ներկայացնող հանցագործներին, որոնք դատապարտված են տևական ժամկետով ու ցմահ ազատազրկման:
Նախորդ տարի Սահմանադրության ընդունման 20-ամյակի կապակցությամբ համաներման տակ էր ընկել մոտ 69.000 մարդ: Նրանց մեծ մասն ազատվել էր քրեական պատասխանատվությունից, մյուսների դեպքում կրճատվել էր պատժաժամկետը:
Պաշտոնական տվյալներով՝ 2013 թվականի սկզբին Ուզբեկստանում յուրաքանչյուր 100.000 բնակչին բաժին է ընկնում 166 բանտարկյալ: Ընդհանուր առմամբ, Ուզբեկստանում ապրում է մոտ 30 միլիոն մարդ:
