Շիմոն Պերեսը պատրաստ է հանդիպել Հասան Ռոուհանիի հետ
Ռուսական ИТАР-ТАСС լրատվական գործակալության փոխանցմամբ՝ Իսրայելի նախագահ Շիմոն Պերեսը պատրաստակամություն է հայտնել հանդիպել Իրանի նախագահ Հասան Ռոուհանիի հետ: Թել Ավիվում տեղի ունեցած բիզնես-կոնֆերանսի ժամանակ Պերեսը հայտարարել է. «Ես պատրաստ եմ հանդիպել Ռոուհանիի հետ, ես թշնամիներ չունեմ, և մենք Իրանը չենք դիտարկում որպես թշնամի:
Հակամարտությունը չի հանդիսանում անձնական հարաբերությունների մասնիկ, դա քաղաքականության հարց է: Հրեական պետության նպատակը թշնամիներին բարեկամների վերածելն է»: Պերեսը, որպես օրինակ, մատնանշել է Պաղեստինի հանգուցյալ առաջնորդ Յասիր Արաֆաթին, որի հետ Իսրայելը համաձայնվեց բանակցել այն բանից հետո, ինչ նա փոխեց իր քաղաքականությունը.
«Անկասկած է, որ մենք նախընտրում ենք Իրանի միջուկային ծրագրի խնդրի դիվանագիտական կարգավորումը: Մենք չենք շտապում կրակել՝ նախընտրելով քաղաքական ու տնտեսական ճնշումը»:
