Սաակաշվիլիին չեն ընդգրկել Վիլնյուս մեկնող վրացական պատվիրակության կազմում

Վրաստանի արտգործնախարար Մայա Փանջիկիձեն սրանից առաջ հայտարարել է, որ Սաակաշվիլին չի կարող Վիլնյուս ժամանել Վրաստանի պաշտոնական պատվիրակության կազմում:

Փանջիկիձեի խոսքերով՝ Լիտվայի նախագահն այդ գագաթաժողովին հրավիրել է նորընտիր նախագահ Գեորգի Մարգվելաշվիլին: Փանջիկիձեն ընդգծել էր, որ կազմակերպիչների կողմից պաշտոնական պատվիրակության կազմը որոշվել էր «1+2+5» ձևաչափով՝ պետության ղեկավար, երկու նախարար և ևս հինգ մարդ:

Նշվում է, որ Միխեիլ Սաակաշվիլին մեծապես հուսով է եղել, որ նոր իշխանությունները հաշվի կառնեն իր ներդրումը Վրաստանի եվրաինտեգրման գործընթացում և նախարարներից մեկի փոխարեն պատվիրակության կազմում կընդգրկեն իրեն:

Համոզվելով, որ չեն արդարանում այդ հույսերը՝ Սաակաշվիլին մեկնեց Բրյուսել, ուր և հանդիպել է Եվրահանձնաժողովի ղեկավար Ժոզե Մանուել Բառոզուի հետ: Հանդիպման ժամանակ Սաակաշվիլին Բառոզուին հայտնել է, որ ուրախ կլինի եթե ԵՄ-ն իրեն հրավիրի Վիլնյուս՝ որպես «պատվավոր հյուր»:

Միևնույն ժամանակ Սաակաշվիլիին կարող են չհրավիրել նաև Վրաստանի նորընտիր նախագահ Գեորգի Մարգվելաշվիլիի երդմնակալության արարողությանը, որը նոյեմբերի 17-ին տեղի է ունենալու Թբիլիսիում:

Վրաստանի խորհրդարանական մեծամասնության ներկայացուցիչ Դավիթ Սագանելիձեն արդեն հայտարարել է, որ Սաակաշվիլին տեղ չունի Մարգվելաշվիլիի երդմնակալությանը: Նա ընդգծել է, որ անմիջապես կհեռանա երդմնակալության վայրից, եթե այնտեղ հայտնվի Սաակաշվիլին: