Սիրիան հայտարարագրել է 1300 տոննա քիմիական նյութ
Ամերիկյան Associated Press լրատվական գործակալության փոխանցմամբ՝ Սիրիան հայտարարագրել է 1300 տոննա քիմիական նյութ, ինչպես նաև 1200 միավոր զինամթերք: Այս մասին նշված է Քիմիական զենքն արգելող կազմակերպության գլխավոր տնօրեն Ահմեթ Ուզյումջյուի զեկույցում:
Դրա հետ մեկտեղ Սիրիան տեղեկատվություն է տրամադրել 41 կառույցի մասին, որոնք տեղակայված են 23 օբյեկտում և որոնք կարող են օգտագործվել քիմիական զենքի արտադրության համար: Ընդ որում, փորձագետները ստուգումներ են անցկացրել դրանցից 37-ում:
Քիմիական զենքն արգելող կազմակերպությունը երեկ հայտարարեց քիմիական զենքի հետ կապված օբյեկտների ստուգման առաջին փուլի ավարտի մասին: Փորձագետները ստուգումներ են անցկացրել 23 հայտարարված օբյեկտից 21-ում:
Հայտարարությունում նշված է, որ չի հաջողվել այցելել երկու օբյեկտ՝ կապված անվտանգության ապահովման խնդիրների առաջացման հետ: Սակայն շարունակվում են մնացյալ օբյեկտներում ստուգումներ անելու փորձերը:
