2026թ. աշխարհի առաջնության ընթացքում հետևորդների ամենամեծ աճն ունեցած 10 ֆուտբոլիստները
Էրլինգ Հոլանդի ոչ ստանդարտ հրապարակումներն Instagram-ում գերել են ամերիկյան լսարանին և 80%-ով ավելացրել հետևորդների թիվը՝ նրան ամրագրելով համացանցում Աշխարհի առաջնության ամենաքննարկվող անձնավորության կարգավիճակը: Հետևորդների աճի ցուցանիշով նորվեգացին շրջանցել է նույնիսկ Վոզինյային: Forbes Sport-ը պատմում է ԱԱ-2026-ի սոցցանցերում ամենահայտնի տասը ֆուտբոլիստների մասին։
FCPress սպորտային մարքեթինգային գործակալության տվյալներով՝ 10 խաղացողներ, որոնք աշխարհի առաջնության ընթացքում Instagram-ում հավաքել են հետևորդների ամենամեծ քանակը, ստացել են 71 հովանավորի աջակցություն։ Հովանավորչական ամենամեծ պորտфельը պատկանում է ոչ թե Լիոնել Մեսիին կամ Քրիշտիանու Ռոնալդուին, այլ նորվեգացի Էրլինգ Հոլանդին, ով գովազդային պայմանագրեր ունի 17 բրենդների հետ, մինչդեռ Մեսին ունի 12-ը: Հոլանդի հովանավորների թվում են Nike-ը, Budweiser-ը, Unilever-ը, Visa-ն և Samsung-ը: Հոլանդը Մեսիին և Ռոնալդուին գերազանցում է նաև աշխարհի առաջնության ընթացքում հետևորդների աճի ցուցանիշով:
Էրլինգ Հոլանդ
Աճը՝ 32,1 մլն հետևորդ (+79%)
Նորվեգիայի հավաքական
Հարձակվող Էրլինգ Հոլանդի լսարանը գրեթե կրկնապատկվել է աշխարհի առաջնության ընթացքում, որին Նորվեգիայի հավաքականը որակավորվել էր առաջին անգամ վերջին 28 տարվա ընթացքում և որտեղ 1/8 եզրափակչում պայքարից դուրս էր թողել Բրազիլիայի հավաքականին, իսկ քառորդ եզրափակչում զիջել Անգլիային: Հոլանդը յոթ գոլ է խփել իր նորամուտային աշխարհի առաջնությունում․ ընդհանուր առմամբ՝ նրա ակտիվում կա անհավանական 59 գոլ՝ազգային հավաքականի կազմում անցկացրած 52 խաղում։ Նորվեգիայի լավագույն հարձակվողի վիճակագրությունը տպավորիչ է նաև սոցցանցերում. ԱԱ-2026-ի ընթացքում նրա Instagram-ի հետևորդների թիվը 40,6 միլիոնից հասել է 72,7 միլիոնի:
Մինչև ԱՄՆ-ում, Մեքսիկայում և Կանադայում կայացած մրցաշարը 26-ամյա ֆուտբոլիստը հանդիսանում էր առևտրային առումով ամենագրավիչ մարզիկներից մեկը (վերջին մեկ տարում Հոլանդը վաստակել էր մոտ 80 միլիոն դոլար՝ ԱԱ-ի խաղացողների շրջանում գրանցելով չորրորդ արդյունքը), բայց այժմ նրա ներուժն զգալիորեն մեծացել է։
Վոզինյա
Աճը՝ 29,4 մլն հետևորդ (+98 000%)
Կաբո Վերդեի հավաքական
Կաբո Վերդեի հավաքականը դարձավ աշխարհի առաջնության գլխավոր սենսացիաներից մեկը: Թիմը ոչ միայն դուրս եկավ իր պատմության մեջ առաջին մունդիալ, այլև հաղթահարեց խմբային փուլը՝ ոչ-ոքի խաղալով Ուրուգվայի, Սաուդյան Արաբիայի և Իսպանիայի հետ. ԱԱ-2026-ի ապագա չեմպիոններին չհաջողվեց հաղթել միայն Կաբո Վերդեին: Իսկ 40-ամյա դարպասապահ Վոզինյան միակն էր, որին իսպանացիները չկարողացան գոլ խփել. նա կատարեց յոթ սեյվ, ճանաչվեց հանդիպման լավագույն խաղացող և դարձավ համաշխարհային աստղ:
Այդ խաղից 48 ժամ անց Վոզինյայի (լրիվ անունը՝ Ժոզիմար Ժոզե Էվորա Դիաշ) Instagram-ին բաժանորդագրվեց ավելի քան 11 միլիոն մարդ. մինչև աշխարհի առաջնության մեկնարկը նրանք ընդամենը շուրջ 30 000-ն էին: Լսարանը շարունակեց աճել, քանի որ Կաբո Վերդեի հավաքականն իր պատմության մեջ առաջին անգամ դուրս եկավ փլեյ-օֆֆ:
ՖԻՖԱ-ի տվյալներով՝ մրցաշարի ընթացքում Վոզինյան ընդհանուր առմամբ կատարել է 18 սեյվ (յոթերորդ տեղը դարպասապահների շրջանում): Բայց ամենակարևորն այն է, որ նրան ճանաչեցին և հիշեցին ամբողջ աշխարհի երկրպագուները, և սա կարող է ներգրավել նոր հովանավորների ու գովազդատուների: Վոզինյան դեռևս որևէ ակումբի հետ պայմանագիր չունի, բայց արդեն նկարահանվել է Կաբո Վերդեի ինտերնետ-պրովայդերի գովազդային հոլովակում և սկսել համագործակցությունը UFL ֆուտբոլային տեսախաղի մշակողների ու Elite Sport սպորտային հանդերձանքի բրենդի հետ:
Ջուդ Բելինգեմ
Աճը՝ 12 մլն հետևորդ (+29%)
Անգլիայի հավաքական
Ջուդ Բելինգեմն օգնեց Անգլիայի հավաքականին գրավել երրորդ տեղը աշխարհի առաջնությունում՝ խփելով յոթ գոլ (նույնքան, որքան Էրլինգ Հոլանդը, իսկ ավելի շատ՝ միայն Լիոնել Մեսին և Կիլիան Մբապեն): Անգլիացու ժողովրդականության աճը սոցցանցերում համընկավ ազգային թիմի կազմ վերադարձի հետ՝ որպես տասներորդ համարի խաղացող՝ այն նույն համարով, որով նա հանդես էր գալիս Եվրո-2024-ում: Եվ չէ՞ որ ԱՄՆ-ում, Մեքսիկայում և Կանադայում կայանալիք մրցաշարի նախօրեին Անգլիայի հավաքականի գլխավոր մարզիչ Թոհաս Տուխելը լրջորեն դիտարկում էր Բելինգեմին թիմի կազմ չվերցնելու տարբերակը:
Մադրիդի «Ռեալի» աստղն աշխարհի առաջնություն էր ժամանել տպավորիչ բիզնես-պորտֆելով։ 23-ամյա Բելինգեմը զբաղեցրել էր ութերորդ տեղը աշխարհի առաջնության ամենաբարձր վարձատրվող ֆուտբոլիստների ցանկում՝ տարեկան 44 միլիոն դոլար եկամով։ իսկ աշխարհի առաջնության հինգ շաբաթից ավելի տևած ընթացքում նրա հետևորդների թիվն աճել է 12 միլիոնով, ինչը Ջուդին կօգնի էլ ավելի շատ վաստակել:
Քրիշտիանու Ռոնալդու
Աճը՝ 11,4 մլն հետևորդ (+1,7%)
Պորտուգալիայի հավաքական
Instagram-ում 11,4 միլիոն հետևորդը կաթիլ է ծովում Քրիշտիանու Ռոնալդուի համար, այդ պատճառով աճը գրեթե չի անդրադարձել տոկոսային ցուցանիշների վրա: Պորտուգալացի սուպերաստղի լսարանն սոցցանցերում առանց այդ էլ գերազանցում էր 1 միլիարդ մարդը (մինչև ԱԱ-ի մեկնարկն Instagram-ում ուներ 666 միլիոն հետևորդ)․ աշխարհում ուրիշ ոչ ոք չունի այդքան: Եվ դժվար թե ունենա՝ հաշվի առնելով, որ պորտուգալացի աստղը շարունակում է մեծացնել հաճախելիության շրջանակը՝ հավաքելով 11 միլիոն նոր ֆոլովեր:
Պորտուգալիայի հավաքականի 41-ամյա հարձակվողը խաղացել է իր վեցերորդ աշխարհի առաջնությունում, սակայն խոշոր միջազգային տղեֆին կրկին խուսափել է նրանից։ 1/8 եզրափակչի փուլում ապագա չեմպիոնների՝ Իսպանիայի դեմ խաղում դուրս մնալուց հետո Ռոնալդուն հայտարարեց ազգային հավաքականում ելույթներն ավարտելու մասին։ Այնուամենայնիվ, սա չի խանգարի նրան մնալ ոչ միայն մոլորակի ամենահայտնի մարդը, այլև ամենաբարձր վարձատրվող մարզիկը. վերջին մեկ տարում Ռոնալդուն վաստակել է 300 միլիոն դոլար, իսկ Forbes-ը հունիսին պորտուգալացուն ներառել է «միլիարդատերերի ակումբում»՝ նրա կարողությունը գնահատելով 1,2 միլիարդ դոլար:
Լամին Յամալ
Աճը՝ 11 մլն հետևորդ (+25%)
Իսպանիայի հավաքական
Իսպանիայի հավաքականի և «Բարսելոնայի» աստղից այս աշխարհի առաջնությունում ավելին էին սպասում, քան մեկ գոլը Սաուդյան Արաբիայի դարպասը։ Այնուամենայնիվ, 19-ամյա ֆուտբոլիստը դարձավ մրցաշարի առաջատարների շրջանում հետևորդների աճով ամենաերիտասարդ խաղացողը Instagram-ում: ԱԱ-2026-ում Իսպանիայի հավաքականի հաղթանակից հետո ակնկալվում է, որ այս ցուցանիշը կշարունակի աճել։
Հավանաբար կշարունակի համալրվել նաև Յամալի հովանավորչական պորտфельը, ով աշխարհի առաջնության նախօրեին պայմանագիր էր ստորագրել American Eagle-ի հետ, ինչն օգնեց խաղային և ոչ խաղային գործունեությունից ստացված նրա ընդհանուր եկամուտը հասցնել 43 միլիոն դոլարի: Իսկ անցած աշխարհի առաջնության ուշադրության կենտրոնում էր հայտնվել նաև ֆուտբոլիստի կրտսեր եղբայրը՝ երեքամյաՔեյնը, ով դարձել էր մրցաշարի խորհրդանիշներից մեկը և օգնում էր խաղադաշտում ոչ այնքան պայծառ եղբորը բարձր պահել ժողովրդականության նշաձողը:
Նեյմար
Աճը՝ 7,7 մլն հետևորդ (+3,3%)
Բրազիլիայի հավաքական
Աշխարհի առաջնությանը Բրազիլիայի հավաքական հրավիրվելու լուրին Նեյմարը արձագանքել էր արցունքներով: ԱՄՆ-ից սոցցանցերում ամենահայտնի բրազիլացի ֆուտբոլիստը հեռացավ նույնպես արցունքներով. նրա թիմը 1/8 եզրափակչի փուլում մրցաշարից դուրս մնաց Նորվեգիայից։ Նեյմարն զգալիորեն ավարտեց կարգիան հավաքականում այն նույն մարզադաշտում, որտեղ և նորամուտը նշել էր: 16 տարի առաջ բրազիլացին առաջին անգամ Բրազիլիայի հավաքականի մարզաշապիկով խաղադաշտ էր դուրս եկել ԱՄՆ-ի դեմ ընկերական խաղում՝ «Մետլայֆ Սթեդիումում», և 27-րդ րոպեին խփել իր առաջին գոլը։ ԱԱ-2026-ի 1/8 եզրափակչում Նեյմարը նորվեգացիների դեմ խաղի վերջին րոպեին իրացրել էր 11-մետրանոցը, իսկ հետո հայտարարել. «Ես այստեղ եմ սկսել, այստեղ էլ կավարտեմ»։
Լիոնել Մեսի
Աճը՝ 7,5 մլն հետևորդ (+1,5%)
Արգենտինայի հավաքական
Լիոնել Մեսին զբաղեցնում է երկրորդ տեղը աշխարհի ամենաբարձր վարձատրվող մարզիկների վարկանիշում՝ մոտ 140 միլիոն դոլար գնահատված եկամով, զիջելով միայն Քրիշտիանու Ռոնալդուին: Ինչպես պորտուգալացու դեպքում, Մեսիի հսկայական լսարանը նրա հետևորդների տոկոսային աճը դարձնում է ավելի քիչ ցուցանշային ինդիկատոր: Այնուամենայնիվ, աշխարհի առաջնության ավելի քան մեկ ամսվա ընթացքում, որտեղ Արգենտինան եզրափակչում պարտվեց Իսպանիային, Մեսիի Instagram-ին ավելացավ 7,5 միլիոն հետևորդ. սա էական արդյունք է նույնիսկ այն պրոֆիլի համար, որն առանց այդ էլ ուներ ավելի քան 500 միլիոն ֆոլովեր:
Խիլբերտո Մորա
Աճը՝ 6,6 մլն հետևորդ (+600%)
Մեքսիկայի հավաքական
Իր 17 տարեկանում Խիլբերտո Մորան այս տարվա աշխարհի առաջնության ամենաերիտասարդ խաղացողն էր: Այն բանից հետո, երբ Մեքսիկան դուրս եկավ 1/8 եզրափակիչ, կիսապաշտպանը գրանցեց ևս մեկ ձեռքբերում՝ ստացավ միջնակարգ դպրոցն ավարտելու դիպլոմ: Ճիշտ է, մեքսիկացի դեռահասի ուրախությունն այսքանով չավարտվեց. նրա հավաքականը պայքարից դուրս մնաց Անգլիայից:
ԱԱ-2026-ում Մորան անցկացրեց չորս հանդիպում: Նրա առաջին դուրս գալը մեկնարկային կազմում տեղի ունեցավ Չեխիայի դեմ խաղում, որտեղ նա խաղաց 72 րոպե, կատարեց 22 փոխանցում և դարձավ փլեյ-օֆֆի խաղում մեկնարկային կազմում խաղադաշտ դուրս եկած՝ սկսած Պելեի ժամանակներից ի վեր ամենաերիտասարդ խաղացողը: Մորայի ելույթը մրցաշարում արագորեն գրավեց եվրոպական առաջատար ակումբների ուշադրությունը. երիտասարդ կիսապաշտպանի նկատմամբ հետաքրքրություն են հայտնել «Ռեալը», «Մանչեսթեր Յունայթեդը», «Չելսին» և «Մանչեսթեր Սիթին»:
Մայքլ Օլիսե
Աճը՝ 5,7 մլն հետևորդ (+109,6%)
Ֆրանսիայի հավաքական
Չնայած այն հանգամանքին, որ ԱԱ-2026-ի գլխավոր ռմբարկուն դարձավ Կիլիան Մբապեն, ֆրանսիացի ֆուտբոլիստների շրջանում Instagram-ում հետևորդների ամենանշանակալի աճը գրանցվեց ոչ թե նրա մոտ: Մայքլ Օլիսեար մունդիալն ավարտեց յոթ գոլային փոխանցմամբ և դարձավ մրցաշարի լավագույն ասիստենտը, ինչպես նաև Ֆրանսիայի հավաքականի՝ ԱԱ-ի ընթացքում ամենահայտնի ֆուտբոլիստը:
Չնայած Օլիսեի աճող ժողովրդականությանը՝ նա պաշտոնական հովանավորչական պայմանագրեր չունի ո՛չ բրենդների, ո՛չ խաղակոշիկների հետ: Նա սովորաբար խաղակոշիկներն ընտրում է իր մարզաշապիկի գույնին համապատասխան: Իսկ ԱԱ-ի ընթացքում Օլիսեշնջել էր իր բոլոր հրապարակումները Instagram-ում՝ դրանք փոխարինելով լուսանկարիչ Ֆլորանս Պերնեի հեռուստացույցի էկրանից արված աղոտ պատկերներով. լուսանկարչին չէին հավատարմագրել ԱՄՆ-ում, Մեքսիկայում և Կանադայում կայացած մրցաշարին, ինչի պատճառով նա սկսել էր նկարել հանդիպումները տանից՝ իր հեռուստացույցի միջոցով:
Էնդրիկ
Աճը՝ 5,6 մլն հետևորդ (+30,6%)
Բրազիլիայի հավաքական
«Ռեալի» հարձակվողը խաղադաշտ դուրս չեկավ Մարոկկոյի դեմ Բրազիլիայի հավաքականի առաջին խաղում, 26 րոպե անցկացրեց Հաիթիի դեմ խաղում, փոխարինման դուրս եկավ Շոտլանդիայի դեմ հանդիպման վերջնամասում և 45 րոպե խաղաց Ճապոնիայի դեմ մրցավեճում: Աշխարհի առաջնությունում բրազիլացիների համար վերջին խաղում՝ Նորվեգիայի դեմ, Էնդրիկը խաղադաշտում անցկացրեց 32 րոպե և փոխարինման դուրս գալուց ընդամենը մեկ րոպե անց չիրացրեց մենմեկը մեկի դուրս գալու հնարավորությունը՝ հիասթափեցնելով իր երկրպագուներին: Իսկ նրանք, չնայած 19-ամյա հարձակվողի անտարբեր խաղին, աշխարհի առաջնության ընթացքում միայն ավելացել են:
Աղբյուրը` Forbes.ru
Հրապարակման պատրաստեց 168.am-ը
